भयंकर! राहत्या घरातून गायब झाली, नंतर चार वर्षीय चिमुकलीचा विवस्त्र अवस्थेत सापडला मृतदेह

म. टा. प्रतिनिधी, पिंपरीः खेड तालुक्यातील मेदनकरवाडी गावच्या हद्दीत घराच्या मागील बाजूस एका चार वर्षीय मुलीचा छिन्नविच्छिन्न अवस्थेतील विवस्त्र मृतदेह गुरुवारी (११ ऑगस्ट) आढळला. बिहारहून मजुरीच्या कामासाठी आलेल्या जोडप्याची ही मुलगी असून, तीन दिवसांपूर्वी हे जोडपे कामासाठी चाकण येथे आले होते. (Pune Crime News)

सहायक पोलिस आय़ुक्त प्रेरणा कट्टे यांनी दिलेल्या माहितीनुसार, मृत मुलगी हरविल्याची तक्रार तिच्या आईने बुधवारी रात्री आठ वाजता चाकण पोलिस ठाण्यात दिली होती. बुधवारी दुपारी एक वाजण्याच्या सुमारास मृत मुलगी आणि तिची बहीण घरात झोपली होती. त्याच वेळी मृत बहीण कोणाला काही न सांगता घराबाहेर पडली. काही वेळानंतर तिचा शोध घेतला असता ती कुठेही आढळून आली नाही. त्यामुळे मुलीच्या आईने पोलिसांत तक्रार दिली.

गुरुवारी (दि. ११) सकाळी कंपनीत कामावर जाणाऱ्या लोकांना एका लहान मुलीचा विवस्त्र अवस्थेतील मृतदेह दिसला. त्यानंतर स्थानिक नागरिकांनी या घटनेची माहिती चाकण पोलिस ठाण्यात कळवली. चाकण पोलिसांनी घटनास्थळी धाव घेऊन परिस्थितीची पाहणी करून चिमुकलीचा मृतदेह शवविच्छेदनासाठी पाठवला. घटनास्थळी पिंपरी-चिंचवड पोलिस आयुक्त अंकुश शिंदे, उपायुक्त मंचक इप्पर, सहायक पोलिस आयुक्त प्रेरणा कट्टे यांनी घटनास्थळाची पाहणी करून पुढील तपासाच्या सूचना दिल्या आहेत.

कुत्र्यांनी तोडले मृतदेहाचे लचके

मृत मुलीचा मृतदेह छिन्नविच्छिन्न अवस्थेत सापडला आहे. कुत्र्यांनी मृतदेहाचे लचके तोडले आहेत. मृतदेहाचा एक पाय नाही. त्यामुळे नक्की काय प्रकार घडला आहे, याचा शोध घेताना पोलिसांना अडचणी येत आहेत. शवविच्छेदन अहवालानंतरच मृत्यूचे कारण कळू शकेल.