'रूफ टॉप'वर कारवाईचा बडगा?, पुणे महापालिकेकडून नोटिसा बजावण्यास सुरुवात

म. टा. प्रतिनिधी, पुणे ः औंध येथील एका 'रूफ टॉप' हॉटेलला आग लागल्याप्रकरणी शहरातील सर्व 'रूफ टॉप' हॉटेलचे सर्वेक्षण सुरू करण्यात आले असून, एकट्या बाणेर-बालेवाडी येथे अशा स्वरूपाची १८ हॉटेल असल्याचे उघडकीस आले आहे. महापालिकेच्या प्राथमिक सर्वेक्षणात शहरातील विविध ठिकाणी ३४ हून अधिक रूफ हॉटेल असल्याचे उघडकीस आले असले तरी हा आकडा ६० च्या पुढे जाण्याची शक्यता आहे. येत्या दोन दिवसांत हे सर्वेक्षण पूर्ण होणार आहे. या सर्व हॉटेलला कारवाई करण्यासाठीच्या नोटिसा बजावण्यास सुरुवात झाली आहे.

महापालिकेच्या सर्वेक्षणात आतापर्यंत या 'रूफ हॉटेल'चा आकडा ३४ पर्यंत आढळला असला तरी अद्याप सर्वेक्षण पूर्ण झालेले नाही. त्यामुळे शहरातील रूफ हॉटेलचा आकडा हा ६० च्या पुढे जाण्याची शक्यता उच्चपदस्थ सूत्रांनी वर्तवली आहे. महापालिकेच्या सर्वेक्षणात किती 'रूफ टॉप' हॉटेल कायदेशीर आणि किती बेकायदा, याचा आढावा घेण्यात येत आहे. त्या वेळी बेकायदा हॉटेलवर कारवाईसाठीच्या नोटिसा बजाविण्यात येत आहेत. औंधमध्ये सानेवाडी परिसरात 'गायकवाड आयटी पार्क' आहे. यातील इमारतीच्या छतावरील हॉटेलला पहाटे पावणेसहाच्या सुमारास अचानक आग लागली होती. या घटनेमुळे शहरातील सर्वच 'रूफ टॉप' हॉटेल महापालिकेच्या रडावर आले आहेत.

'रूफ टॉप' बेकायदा कसे?

एकात्मिक बांधकाम नियंत्रण नियमावलीत 'रूफ टॉप' हॉटेल अशी संकल्पनाच नसल्याचे उच्चपदस्थ अधिकाऱ्यांनी सांगितले. महापालिकेकडूनही आतापर्यंत अशा कुठल्याही हॉटेलला परवानगी दिलेली नाही. बऱ्याच वेळा टेरेस काही प्रमाणात अधिकृत बांधकाम असलेल्या जागेत 'रेस्टारंट'ची परवानगी घेण्यात येते आणि या बांधकामालगत असलेल्या टेरेसवर बेकायदा हॉटेल थाटले जाते. शहरातील काही 'रूफ टॉप' हॉटेलला अशा प्रकारे परवानगी आहे. काही ठिकाणची हॉटेल पूर्ण बेकायदा आहेत. परवानगी असलेले त्याआधारे मद्यविक्रीचा परवाना मिळवतात आणि संपूर्ण टेरेस काबीज करून त्यावर मोठे हॉटेल थाटतात.

ठिकाण हॉटेलची संख्या

बाणेर-बालेवाडी १८

कोथरूड-बावधन खुर्द ०५

शिवाजीनगर ०६

कोरेगाव पार्क आणि परिसर १३