पुण्यात मास्क न घालणाऱ्यांकडून २९ कोटींचा दंड वसूल

म. टा. प्रतिनिधी, पुणे

करोनामुळे लाखो लोकांचा मृत्यू झाल्यानंतरही अजूनही नागरिकांमध्ये बेफिकिरी असून, मास्क न घालणाऱ्या आणि रस्त्यावर थुंकणाऱ्या जिल्ह्यातील सहा लाख ९७ हजार नागरिकांवर कारवाई करून आतापर्यंत २९ कोटी ७३ लाख ८० हजार रुपयांचा दंड वसूल करण्यात आला आहे. करोनाबाबतच्या नियमांचे उल्लंघन करणाऱ्यांमध्ये सर्वाधिक नागरिक हे पुणे शहरातील असून, पुण्यातील चार लाख दहा हजार ८२९ नागरिकांवर कारवाई झाली आहे.

करोनाचा प्रादुर्भाव रोखण्यासाठी मास्क घालणे सक्तीचे करण्यात आले असून, रस्त्यावर थुंकणाऱ्यांविरुद्ध पोलिस आणि स्थानिक प्रशासनाकडून कारवाई सुरू आहे. नागरिकांमध्ये अद्यापही बेफिकिरी असल्याचे कारवाईतून स्पष्ट झाले आहे.

मास्क न घालणाऱ्या नागरिकांना ५०० रुपये; तर सार्वजनिक ठिकाणी थुंकणाऱ्या नागरिकांना एक हजार रुपये दंड आकारण्यात येत आहे. दंडाची रक्कम वसूल करण्याचे अधिकार पोलिस, महापालिका आणि ग्रामपंचायत कर्मचारी यांना देण्यात आले आहेत. त्यानुसार कारवाई सुरू आहे.

पुणे, पिंपरी-चिंचवड शहर आणि जिल्ह्यात आतापर्यंत सहा लाख ९७ हजार ६७ नागरिकांवर कारवाई झाली आहे. त्यांच्याकडून २९ कोटी ७३ लाख ८० हजार ८२३ रुपयांचा दंड वसूल करण्यात आला आहे. सर्वाधिक कारवाई ही पुणे शहरात झाली आहे. पुण्यातील चार लाख दहा हजार ८२९ नागरिकांवर कारवाई होऊन त्यांच्याकडून १९ कोटी ४१ लाख ३८ हजार ५३८ रुपये दंड वसूल झाला आहे. पिंपरी-चिंचवड शहरात ६४ हजार ४८१ नागरिकांवर कारवाई करण्यात आली असून, त्यांच्याकडून तीन कोटी ४१ लाख ७३ हजार ४०० रुपये दंड घेण्यात आला आहे. जिल्ह्याच्या ग्रामीण भागात दोन लाख २१ हजार ७५७ नागरिकांवर कारवाई झाली आहे. त्यांच्याकडून सहा कोटी ९० लाख ६८ हजार ८८५ रुपये दंड वसूल करण्यात आला असल्याचे जिल्हा प्रशासनाकडून सांगण्यात आले.


क्षेत्र कारवाई झालेल्या नागरिकांची संख्या दंडाची रक्कम

पुणे महापालिका ४,१०,८२९ १९,४१,३८,५३८

पिंपरी-चिंचवड महापालिका ६४,४८१ ३,४१,७३,४००

जिल्ह्याचा ग्रामीण भाग २,२१,७५७ ६,९०,६८,८८५

एकूण ६,९७,०६७ २९,७३,८०,८२३