पुणेकरांनो सावधान: वेगळाच बहाणा करून घरात एण्ट्री करायचा तरूण आणि...

म.टा. प्रतिनिधी, पुणे : वायफाय आणि केबलचे काम असल्याचे सांगून सोसायटीमध्ये शिरून भर दिवसा घरफोडी करणाऱ्याला फरासखाना पोलिसांनी बेड्या ठोकल्या आहेत. त्याच्याकडून शहरातील पाच घरफोडीचे गुन्हे उघडकीस आले असून, साडेनऊ लाख रुपये किमतीचे सोने-चांदीचे दागिने, सात लॅपटॉप आणि एक दुचाकी असा ऐवज पोलिसांनी जप्त केला आहे.

पोलिस उपायुक्त डॉ. प्रियांका नारनवरे आणि वरिष्ठ पोलिस निरीक्षक राजेंद्र लांडगे यांनी बुधवारी पत्रकार परिषदेत या कारवाईची माहिती दिली. प्रज्वल गणेश वानखेडे उर्फ रेवणनाथ (वय २५, रा. औरंगाबाद) असे अटक करण्यात आलेल्या आरोपीचे नाव आहे. सागर कैलास भोसले (वय ३७, रा. ओंकार कृपा सहकारी गृहरचना संस्था, केदारेश्वर बोळ, कसबा पेठ) यांनी घरफोडीबाबत तक्रार दिली होती.

एनआयएच्या कारवायांबाबत राज्य सरकार, गृहखात्याला माहितीच नाही; सत्य लपवून का ठेवले?

भोसले घरात झोपलेले असताना त्यांची पत्नी दाराला कुलूप लावून बाहेर गेल्या. कुलूप उचकटून चोराने घरात शिरकाव केला. घरात चोरी झाल्याचे आढळल्यानंतर भोसले यांनी फरासखाना पोलिस ठाण्यात तक्रार दाखल केली. त्यानंतर पोलिसांनी घटनास्थळाची पाहणी करून सीसीटीव्हीचे चित्रीकरण तपासले. त्या वेळी संशयित वानखेडे नाना पेठेत फिरताना आढळून आला. नाना पेठेतील लॉजमधून त्याला ताब्यात घेतल्यानंतर चौकशीत फरासखाना आणि भारती विद्यापीठ पोलिस ठाण्याच्या हद्दीतील घरफोड्यांचा प्रकार उघड झाला. त्याच्याकडून नऊ लाख ६५ हजार ४०० रुपये किमतीचे सोने-चांदीचे दागिने, सात लॅपटॉप आणि एक दुचाकी असा ऐवज पोलिसांनी जप्त केला आहे. लांडगे यांच्यासह पोलिस निरीक्षक शब्बीर सय्यद, सहायक पोलिस निरीक्षक सुशील बोबडे, उपनिरीक्षक अभिजित पाटील आणि अजितकुमार पाटील, अंमलदार समीर माळवदकर, अभिनय चौधरी, रिजवान जिनेडी, मेहबूब मोकाशी, सचिन सरपाले, राकेश क्षीरसागर, संदीप कांबळे, समीर माळवदकर यांच्या पथकाने ही कारवाई केली.

'यू- ट्यूब'वर व्हिडिओ पाहून घरफोड्या

प्रज्ज्वल वानखेडे उच्चशिक्षित असून, त्याच्याकडे एमसीए (सॉफ्टवेअर) पदवी आहे. औरंगाबाद येथील टोलनाक्यावर तो व्यवस्थापक म्हणून कामाला होता. नोकरी गेल्यानंतर तो घरफोडी करायला लागला. त्यासाठी त्याने 'यू-ट्यूब'वरील व्हिडिओ पाहिले होते. पुण्यात तो लॉजवर राहत होता. वायफाय आणि केबलचे काम असल्याचे वॉचमनला सांगून तो सोसायटीत प्रवेश करून घरफोड्या करायचा, असे तपासात निष्पन्न झाले आहे, असे वरिष्ठ पोलिस निरीक्षक राजेंद्र लांडगे यांनी सांगितले.