मुलींचा विनयभंग करणारा तरुण गजाआड

पुणे:
मुलींना निर्जन ठिकाणी गाठून त्यांचा विनयभंग करणाऱ्या २२ वर्षीय तरुणाला कात्रज पोलिसांनी अटक केली आहे. वैभव कांबळे असं या तरुणाचं नाव आहे. एका मुलीच्या आईने पोलिसांत तक्रार दाखल केली होती. त्यानंतर पोलिसांना या परिसरात वॉच ठेवला आणि वैभव सापडला. चौकशीअंती कळलं की वैभवने केवळ या एकाच मुलीला त्रास दिलेला नाही तर तो अनेक शाळांच्या आसपासच्या परिसरात हाच उद्योग करायचा. स्थानिकांनीही पोलिसांना या माहितीचा दुजोरा दिला. काही मुलींनी तर याच्या भितीने घराबाहेर पडणंच बंद केलं होतं.

ज्या १३ वर्षांच्या मुलीच्या आईने तक्रार दाखल केली, त्या मुलीला वैभवने एका निर्जन स्थळी गाठून पत्ता विचारला आणि त्या बहाण्याने त्याने तिचा विनयभंग केला. ही मुलगी ट्युशनला जात असताना हा प्रकार घडला. ती घाबरली आणि तेथून पळाली. तिने तिच्या शिक्षकांना झाला प्रकार सांगितला. शिक्षकांनी आणखी काही लोकांच्या मदतीने आरोपीली शोधायचा प्रयत्न केला, पण वैभव तेथून पसार झाला होता. मुलीच्या आईला शिक्षकांनी फोन करून तत्काळ बोलावले. मुलगी रडत होती. आई तेथे पोहोचली तेव्हा गर्दी जमली होती. कात्रज येथील महावीर नगरात १९ नोव्हेंबर रोजी दुपारी ३.३० वाजता ही घटना घडली.

पसार झालेला वैभव दुसऱ्याच दिवशी त्याच परिसरात दुसऱ्या एका मुलीची छेड काढत होता. मुलीने त्याच ठिकाणी त्याला पाहिले आणि आईला जाऊन सांगितले. त्यानंतर तिच्या आईने पोलिसांत तक्रार दिली. पोलिसांनी परिसरातले सर्व सीसीटीव्ही पिंजून काढले आणि एका टीपच्या आधारे त्यांनी सापळा रचून वैभवला पकडले.