दहशत निर्माण करण्यासाठी साधलं वाढदिवसाचं निमित्त; पाहा पुण्यात काय घडलं?

पुणे: वाढदिवस साजरा करण्यासाठी व त्याची चर्चा घडवून आणण्यासाठी हल्ली तरुणाईकडून नवनवीन आयडिया लढवल्या जातात. पुण्यातील एका 'बर्थ-डे बॉय'नं स्वत:ची दहशत निर्माण करण्यासाठी वाढदिवसाची संधी साधली आहे. त्यानं चक्क कोयत्यानं केक कापून तो व्हिडिओ सोशल मीडियावर व्हायरल केला आहे.

हा बर्थ डे बॉय अल्पवयीन आहे. पोलिसांनी त्याच्याविरुद्ध गुन्हा दाखल केला आहे. पुण्यातील लोहियानगर परिसरात हा प्रकार घडला आहे. पोलिसांकडून मिळालेल्या माहितीनुसार, १४ फेब्रुवारी रोजी पुण्यातील लोहियानगर भागात पी. एम. सी कॉलनी नं ९ येथे या तरुणाचा वाढदिवस होता. वाढदिवसाचा केक कापण्यासाठी कोयत्याचा वापर करण्यात आला. एवढ्यावरच तो थांबला नाही, तर हातात कोयता घेऊन डीजे लावून नाचत असतानाचा व्हिडिओ देखील त्यानं सोशल मीडियावर व्हायरल केला. त्या माध्यमातून परिसरात दहशत निर्माण करण्याचा प्रयत्न केला.

वाचा: संजय राऊतांची पत्रकार परिषद संपताच अमृता फडणवीस यांचं ट्वीट; म्हणाल्या...

खडक पोलिसांना ही माहिती मिळताच पोलिसांनी घटनास्थळी धाव घेतली आणि 'बर्थ डे बॉय'ला ताब्यात घेतले. त्याच्याकडून एक कोयता आणि ५०० रुपये किमतीच्या वस्तू जप्त करण्यात आल्या आहेत. खडक पोलीस ठाण्यात या प्रकरणी गुन्हा दाखल करण्यात आला आहे.

वाचा: सरकारी रुग्णालयात तीन महिन्याला 'मॉक ड्रिल'