‘खाकी’ चोरट्यांनी लुटले

औरंगाबादच्या नागरिकाची ई-मेलद्वारे तक्रार; एक अटकेत

म. टा. प्रतिनिधी, पुणे

औरंगाबाद येथील व्यक्तीला खोट्या गुन्ह्यात अडकविण्याची धमकी देऊन फरासखाना पोलिस ठाण्यातील दोन पोलिसांनी २५ हजार रुपये उकळल्याचा धक्कादायक प्रकार समोर आला आहे. या व्यक्तीने पुणे पोलिसांकडे ई-मेलद्वारे तक्रार केल्यानंतर दोन्ही पोलिस कर्मचाऱ्यांवर फरासखाना पोलिसात गुन्हा दाखल करून एकाला अटक करण्यात आली.
गणेश मारुती सोनवणे आणि अनिल हनुमंत रासकर (पोलिस शिपाई फरासखाना) अशी गुन्हा दाखल केलेल्यांची नावे आहेत. सोनवणे याला रात्री अटक करण्यात आली. या प्रकरणी ३९ वर्षीय व्यक्तीने ई-मेलद्वारे तक्रार दिली आहे. पोलिसांनी दिलेल्या माहितीनुसार, तक्रारदार मुंबई येथे मंत्रालयात त्यांच्या कामानिमित्त गेले होते. त्यानंतर ते सहा मे रोजी कारने मित्रासह पुण्यात आले. त्यांनी मित्राला पुण्यात सोडले आणि सदाशिव पेठ येथील एका लॉजवर जाण्यासाठी निघाले. त्यावेळी ते लक्ष्मी रस्त्याने रविवार पेठ चौकीसमोरील चौकात आले. त्यावेळी रस्त्यावर नाकाबंदी करण्यात आली होती.
सोनवणे आणि रासकर तेथे नेमणुकीस होते. त्यांनी रासकर यांची कार अडविली. त्यांना कारची तपासणी करण्यासाठी थांबवून घेऊन त्यांच्या कारची चावी काढून घेतली. तसेच, मोबाइल, लायसन्स हिसकावले. तुम्ही रेडलाइट एरियामध्ये आल्यामुळे तुमच्यावर गुन्हा दाखल करावा लागेल, अशी धमकी दिली. त्यानंतर गुन्हा दाखल न करण्यासाठी तीस हजार रुपयांची मागणी केली. झालेल्या प्रकारामुळे तक्रारदार घाबरून गेले आणि भीतीपोटी २५ हजार रुपये देण्यास तयार झाले. त्यावेळी दोघांनी त्यांच्याकडील एटीएम कार्ड घेऊन २५ हजार रुपये जबरदस्तीने काढून घेतले. पैसे मिळाल्यानंतर त्यांना त्यांचा मोबाइल, कारची चावी, लायसन्स परत दिले.
औरंगाबादला परतल्यानंतर त्यांनी ई-मेलद्वारे तक्रार केली. त्यानंतर पुणे पोलिसांनी त्याची दखल घेऊन सोनवणे आणि रासकर विरोधात गुन्हा दाखल केला. या बाबत वरिष्ठ पोलिस निरीक्षक बी. जी. अंबुरे म्हणाले की, ‘ तक्रादाराने ई-मेलवर तक्रार केली होती. त्यानुसार गुन्हा दाखल करण्यात आला आहे. या प्रकरणी एकाला रात्री उशिरा अटक करण्यात आली आहे.’

वरिष्ठांचा धाक नसल्याची चर्चा
गेल्या आठवड्यात डिझेलचोरीच्या गुन्ह्यात थेट पोलिस उपनिरीक्षक आणि कर्मचाऱ्याचा सहभाग असल्याचे समोर आले होते. याप्रकरणी त्यांना अटक झाली. आता फरासखाना पोलिस ठाण्यातील दोन कर्मचाऱ्यांनी नागरिकाला दमदाटी करून त्याच्याकडून पैसे उकळल्याचे समोर आले आहे. त्यामुळे पुणे पोलिस दलावर वरिष्ठांचा वचक नसल्याची चर्चा सुरू झाली आहे.