‘गुगल सर्च’वर पुणे लोकप्रिय

Surendra.Dol@timesgroup.com

Tweet : SurendraDolMT

पुणे : देशात राहण्यायोग्य शहरांच्या (लिव्हिबिलिटी इंडेक्स) यादीमधील पहिल्या पाच शहरांच्या 'गुगल सर्च'बद्दल केलेल्या विश्लेषणात मुंबईबद्दल देशात सर्वाधिक सर्च झाल्याचे दिसते. त्याच्या खालोखाल देशपातळीवर नेटिझन्सनी पुण्याबद्दल सर्वाधिक सर्च घेतल्याचे चित्र आहे.

'गुगल ट्रेंड'च्या माध्यमातून 'गुगल'वरील सर्च क्युरिजचे विश्लेषण उपलब्ध होत असते. केंद्रीय गृहनिर्माण आणि नागरी व्यवहार मंत्रालयाने नुकत्याच जाहीर केलेल्या राहण्यायोग्य शहरांच्या यादीत पुण्याने पहिला क्रमांक पटकावला आहे. या 'लिव्हिबिलिटी इंडेक्स'मध्ये पहिल्या दहा शहरांमध्ये अनुक्रमे पुणे, नवी मुंबई, मुंबई, तिरुपती, चंडीगड, ठाणे, रायपूर, इंदूर, विजयवाडा आणि भोपाळ या शहरांचा समावेश आहे. या यादीमधील पहिल्या पाच शहरांचे 'गुगल ट्रेंड'वरील विश्लेषण पाहिले असता 'गुगल सर्च'मध्ये मुंबई देशात अव्वल असल्याचे दिसते. त्या खालोखाल पुण्याबद्दल सर्च झाले आहेत.

मुंबई, पुण्याचे आकर्षण

देशाचे आर्थिक केंद्र असलेल्या मुंबईबद्दल नेटिझन्सनी केलेल्या सर्चचे प्रमाण सरासरी ७८ टक्के इतके आहेत. त्याखालोखाल पुण्याबद्दल ४६ टक्के इतके सर्च झाले आहेत. चंडीगडबद्दल १६ टक्के, तिरुपतीबद्दल ७ टक्के, तर नवी मुंबईबद्दल २ टक्के सर्च झाले आहेत. मुंबई आणि पुण्याच्या तुलनेत इतर शहरांच्या 'गुगल सर्च'च्या प्रमाणात मोठे अंतर असल्याचे दिसते.

राज्यनिहाय शहरांचा 'इंटरेस्ट'

'गुगल ट्रेंड'च्या विश्लेषणातील 'इंटरेस्ट ऑफ पुणे' या पर्यायामध्ये महाराष्ट्रातून पुण्याबद्दल अधिक सर्च झाल्याचे दिसते. त्याखालोखाल अंदमान आणि निकोबार बेटे, तसेच अरुणाचल प्रदेश, मेघालय, नागालँड या ईशान्य भारतीय राज्यांमधून पुण्याबद्दल लक्षणीय प्रमाणात सर्च झाल्याचे दिसते. 'इंटरेस्ट ऑफ मुंबई' या पर्यायातील विश्लेषण पाहिले असता दमण आणि दीव, दादरा आणि नगर हवेली, ओडिशा, गुजरात, गोवा या भागातून मुंबईबद्दल अधिक सर्च झाले आहेत. 'इंटरेस्ट ऑफ नवी मुंबई' या पर्यायात झारखंडमधून लक्षणीय प्रमाणात सर्च दिसतात. 'इंटरेस्ट ऑफ तिरुपती' या पर्यायात आंध्र प्रदेश, पुद्दुचेरी, तेलंगण, तमिळनाडू आणि कर्नाटक या दक्षिण भारतीय राज्यांतून लक्षणीय सर्च झाले आहेत.

शहर - सर्चचे प्रमाण (टक्केवारी)

मुंबई : ७८

पुणे : ४६

चंडीगड : १६

तिरुपती : ७

नवी मुंबई : २