विशेष निधीसह तांत्रिक साह्य; स्वतंत्र अधिकारी मिळणार म. टा. प्रतिनिधी, पुणे शहरासमोरील विविध आव्हानांचा मुकाबला करण्यासाठी सज्ज असलेल्या ‘१०० रेझिलियन्ट सिटीं’च्या यादीत पुण्याचा समावेश झाला आहे. आगामी काळात उद्भवणाऱ्या आव्हानांचा सामना करण्यासाठी पुण्याला विशेष निधीसह तांत्रिक साह्य आणि स्वतंत्र अधिकारीही मिळणार आहे. सार्वजनिक वाहतूक व्यवस्था, परवडणारी घरे, पाणी व्यवस्थापन आणि प्रदूषण या विषयांवर ‘रेझिलियन्ट सिटीं’ना एकत्र काम करता येणार आहे. केंद्र सरकारच्या स्मार्ट सिटी योजनेत यापूर्वीच समावेश झालेल्या पुण्याच्या शिरपेचात ‘रेझिलियन्ट सिटी’तील निवडीमुळे आणखी एक तुरा खोवला गेला आहे, अशी भावना महापौर प्रशांत जगताप यांनी बुधवारी व्यक्त केली. शहरातील विविध प्रश्नांवर जागतिक स्तरावरील तज्ज्ञांच्या सहकार्याने मात करता येणे यामुळे शक्य होणार असल्याचा दावा त्यांनी केला. न्यूयॉर्कमधील ‘रॉकफेलर फाउंडेशन’तर्फे जागतिक स्तरावर ही स्पर्धा घेण्यात आली होती. ‘रेझिलियन्ट सिटी’मध्ये निवड झाल्याने विविध आव्हानांवर तोडगा शोधण्यासाठी ‘रेझिलियन्ट ऑफिसर’ची नियुक्ती फाउंडेशनतर्फेच केली जाणार असून, त्याचा सर्व खर्चही त्यांच्यातर्फे केला जाईल, अशी माहिती महापालिका आयुक्त कुणाल कुमार यांनी दिली. आंतरराष्ट्रीय स्तरावरील अनुभवी अधिकारी त्यासाठी नेमण्यात येणार असून, ही निवड तीन ते पाच वर्षांसाठी असेल. या कालावधीत शहरासमोरील आव्हानांचा प्राधान्यक्रम ठरवून त्यानुसार उपाययोजनांची दिशा निश्चित केली जाईल, असे त्यांनी सांगितले. या स्पर्धेत पुण्यासह जयपूरची निवड अखेरच्या टप्प्यात करण्यात आली असून, बेंगळुरू, चेन्नई आणि सुरत या शहरांचाही समावेश यामध्ये केला गेला आहे. २०१३ पासून ही स्पर्धा घेतली जात आहे. यापूर्वी, जगभरातील ६७ शहरांची निवड केली गेली होती. अखेरच्या टप्प्यातील ३३ शहरांमध्ये पुणे, जयपूरसह केपटाऊन, जकार्ता, क्योटो, मँचेस्टर, नैरोबी, पनामा, सिएटल, सेऊल तेल अवीव, टोरोंटो, वॉशिंग्टन अशा प्रमुख शहरांचा समावेश आहे.
पुणे झाले ‘रेझिलियन्ट’
शहरासमोरील विविध आव्हानांचा मुकाबला करण्यासाठी सज्ज असलेल्या ‘१०० रेझिलियन्ट सिटीं’च्या यादीत पुण्याचा समावेश झाला आहे.
Maharashtra Times 26 May 2016, 3:00 am