पुण्यात मुलानं केला आई-वडिलांचा खून

पुणे: पुण्यातील शनिवार पेठ भागात एका ३० वर्षांच्या तरुणानं स्वत:च्या आई-वडिलांचा खून केल्याची घटना उघडकीस आली आहे. पराग क्षीरसागर असं आरोपी तरुणाचं नाव असून पोलिसांनी त्याला ताब्यात घेतलं आहे. या घटनेमुळं परिसरात हळहळ व्यक्त होत आहे.

पराग हा मानसिक रुग्ण होता. त्याच्यावर उपचार सुरू होते. त्यानं वडिलांना गळा चिरून मारलं, तर आईचा गळा दाबून खून केला. प्रकाश क्षीरसागर (६०) व आशा क्षीरसागर (५५) अशी मृतांची नावं आहेत. आई-वडिलांना मारल्यानंतर परागनं स्वत:च्या हाताची नस कापून आत्महत्येचा प्रयत्न केला. मात्र, तो वाचला. परागला एक जुळा भाऊ असून तो यावेळी घरातच होता, अशी माहिती समोर आली आहे. विश्रामबाग पोलिसांनी परागला ताब्यात घेतलं असून पुढील तपास सुरू आहे.