वाहतूक नियमांबद्दल जनजागृती

पुणे : जागतिक महिला दिनानिमित्त ‘व्होडाफोन इंडिया’तर्फे महिलांच्या सहभागातून वाहतुकीच्या नियमांबद्दल जनजागृती करण्यात आली. व्होडाफोनमधील महिला कर्मचारी आणि पुणे वाहतूक पोलिसांच्या सहकार्याने ही रस्ता सुरक्षा मोहीम राबवण्यात आली.

उत्साही महिलांच्या या टीमने शहरात वाहनचालक आणि पादचाऱ्यांचे रस्ता सुरक्षेबाबत प्रबोधन केले. रस्ता सुरक्षेसंदर्भातील सर्व बाबींवर भर देता यावा, यासाठी त्यांनी महत्त्वाचे रस्ते आणि चौक निवडले होते. या टीमने नागरिकांशी प्रत्यक्ष संवाद, नियम सांगणाऱ्या फलकांबरोबरच वाहतूक नियमांच्या माहितीपुस्तिकांचेही वाटप केले.

‘व्होडाफोन इंडिया’च्या महाराष्ट्र आणि गोवा परिमंडळाचे व्यवसायप्रमुख आशिष चंद्रा आणि वरिष्ठ पोलिस निरीक्षक सुशील कदम, पोलिस उपनिरीक्षक रूपाली कुलथे यांच्या हस्ते या मोहिमेचे उद्घाटन झाले. ‘व्होडाफोन’चे वाकडेवाडी येथील कार्यालय येथून ही मोहीम सुरू होऊन पुढे जंगली महाराज रस्ता, डेक्कन जिमखाना परिसर, अलका टॉकीज, टिळक रस्ता, पुणे स्टेशन रस्ता आणि कर्वे रस्ता व कोथरूड येथे ही मोहीम राबवण्यात आली.

‘महिलांमध्ये समाजात सकारात्मक बदल घडवून आणण्याची ताकद असते, यावर आमचा विश्वास आहे. रस्ता सुरक्षा हा सर्वांसाठीच अतिशय महत्त्वाचा विषय आहे. समाजात याबाबत जाणीव जागृती निर्माण करण्यामध्ये त्यांचा सहभाग वाढल्यास रस्त्यावर चांगले बदल अनुभवायला मिळतील,’ असे मत चंद्रा यांनी व्यक्त केले.