‘नॅक’ची दिशाभूल करून ‘अ’दर्जा

आमदार प्रा. मेधा कुलकर्णी यांचा विद्यापीठावर आरोप

म. टा. प्रतिनिधी, पुणे

‘सावित्रीबाई फुले पुणे विद्यापीठ प्रशासनाने नॅकला प्राध्यापकांची संख्या, प्राध्यापकांच्या विविध पदव्या आणि शैक्षणिक माहिती चुकीची माहिती देऊन अ दर्जा मिळवला आहे. या प्रकाराकडे नॅकनेही दुर्लक्ष केले आहे,’ असा आरोप आमदार प्रा. मेधा कुलकर्णी यांनी सोमवारी पत्रकारपरिषदेत केला.

कुलकर्णी म्हणाल्या,‘ विद्यापीठाने राष्ट्रीय मूल्यांकन अधिस्वीकृती परिषदेला (नॅक) सादर केलेल्या अहवालामध्ये प्राध्यापकांच्या संख्येची आणि त्यांच्या शैक्षणिक अर्हतेची चुकीची माहिती दिली आहे. विद्यापीठाने चुकीच्या माहितीच्या आधारे अ दर्जा मिळविला आहे. विद्यापीठ प्रशासनाचा बोगस कारभार सुरू असून, त्याकडे दुर्लक्ष करण्यात येत आहे. विद्यापीठातील एमटेकसह इतर काही अभ्यासक्रमांना प्रवेश घेण्याच्या पात्रतेबाबत आणि मान्यतेबाबतही गोंधळ आहे. याबाबत काही दिवसांपूर्वीच आपण नॅकशी पत्रव्यवहार केला आहे. त्याचे उत्तर काही दिवसात येणे अपेक्षित आहे.’

विद्यापीठातील एमटेक अभ्यासक्रमासाठी यापूर्वी कला आणि वाणिज्य शाखेचेही विद्यार्थी प्रवेश घेऊ शकत होते. याबाबत पाठपुरावा केल्यानंतर विद्यापीठाने चुकीची दुरूस्ती केली. विद्यापीठाच्या बहिस्थ विभागाचे कामकाज नियमाप्रमाणे नव्हते. तेथील अभ्यास केंद्र, अभ्यासक्रम याबाबतही सातत्याने पाठपुरावा केल्याने प्रश्न मार्गी लागल्याचे कुलकर्णी यांनी नमूद केले. दरम्यान, देशभरातील मुक्त विद्यापीठांमध्ये २००९ पासून एमफिल आणि पीएचडीला मान्यता देण्याचे बंद झाले होते. मात्र, विद्यापीठ अनुदान आयोगाकडे पाठपुरावा केल्यानंतर ही मान्यता देण्याचा निर्णय झाला आहे, असे कुलकर्णी यांनी सांगितले.

मुक्त विद्यापीठातील पदविका (डिप्लोमा) अभ्यासक्रमांना विद्यापीठ अनुदान आयोगाची मान्यता गरजेची होती. यासाठी पाठपुरावा केल्यानंतर मान्यता गरजेची नसल्याचे स्पष्ट करण्यात आले आहे. याचप्रमाणे ‘बी-टेक’ अभ्यासक्रमाला ‘एआयसीटीई’ची मान्यता गरजेचे नसल्याचे सांगण्यात आले आहे. विश्वकर्मा क्रिएटिव्ह आय कॉलेजमधील ‘बीएफए’ आणि ‘एमएफए’ या पदवी व पदव्युत्तर अभ्यासक्रमांबाबत असलेला संभ्रम दूर झाला असून, या अभ्यासक्रमांना ‘एआयसीटीई’च्या मान्यता गरजेची नाही. तसेच, ज्यांनी या अभ्यासक्रमांचे शिक्षण घेतले आहेत, त्यांच्या पदव्या ग्राह्य धरल्या जातील, अशी माहिती कुलकर्णी यांनी दिली.