'पारदर्शक' सभेच्या भागातही कमळालाच साथ

पुणे: शहराच्या मध्यवस्तीत भारतीय जनता पक्षाचा वरचष्मा कायम असल्याचे महापालिका निवडणुकांनी पुन्हा सिद्ध केले आहे. शनिवार-नारायण, सदाशिव पेठ, नवी पेठ-पर्वती यासह रास्ता-रविवार पेठेमध्ये १२ पैकी भाजपचे नऊ नगरसेवक निवडून आले आहेत. या प्रभागाच्या हद्दीत झालेली मुख्यमंत्र्यांची सभा रद्द होऊनही मतदारांनी भाजपवरच पूर्ण विश्वास दाखवल्याचे स्पष्ट झाले आहे.

या प्रभागात भाजपने काही धक्कादायक निर्णय घेऊन चार ते पाच विद्यमान नगरसेवकांचे तिकीट कापले होते. त्यामुळे, पक्षांतर्गत नाराजीचा तसेच, शिवसेनेशी युती नसल्याने त्याचा फटका बसेल, अशी शक्यता वर्तवली जात होती. मात्र, सर्व शंका दूर सारून भाजपने बहुतेक जागांवर दणदणीत विजय मिळवला. पूर्व भागात आंदेकर कुटुंबीयांनी वर्चस्व कायम ठेवले. तर, रास्ता पेठ-रविवार पेठ भागातून विशाल धनवडे यांनी भाजपच्या अरविंद कोठारी यांचा पराभव केला. शनिवार-सदाशिव पेठेमध्ये मनसेच्या विद्यमान नगरसेविका रूपाली पाटील यांचा भाजपच्या गायत्री खडके-सूर्यवंशी यांनी साडेअकरा हजार मतांनी पराभव केला. भाजपच्या मुक्ता टिळक यांनी राष्ट्रवादीच्या विद्या पोकळे यांचा तब्बल २३ हजार मतांनी पराभव केला.

शिवसेनेचे गटनेते पराभूत

नवी पेठ-पर्वती (प्रभाग २९) भागातून शिवसेनेचे गटनेते अशोक हरणावळ यांचा धक्कादायक पराभव झाला. इथून राष्ट्रवादीचे विद्यमान नगरसेवक विनायक हणमघर सुद्धा पराभूत झाले.