पुणेकरांचे वाचले ९०० कोटी रुपये

म. टा. प्रतिनिधी, पुणे

समान पाणी पुरवठा योजनेच्या वादग्रस्त फेरनिविदा उघडण्यात आल्या असून, त्या सरासरी ११ टक्के कमी दराने आल्याचे गुरुवारी स्पष्ट झाले. याच कामाच्या सुरुवातीला काढण्यात आलेल्या निविदा २६ टक्के जादा दराने आल्या होत्या. या पार्श्वभूमीवर फेरनिविदांमुळे पुणेकरांचे किमान ९०० कोटी रुपये वाचल्यावर शिक्कामोर्तब झाले आहे. दरम्यान, या सर्व निविदांमध्ये सर्वांत कमी दर 'एल अँड टी' कंपनीने भरल्याचे दिसत असून, निविदांतील अटीप्रमाणे या कंपनीला सहा पैकी चार पॅकेजची कामे मिळणार आहेत.

समान पाणी पुरवठा योजनेच्या फेरनिविदा उघडण्यात आल्या असून, सहाही पॅकेजच्या निविदांमध्ये सरासरी ११ टक्के कमी दराने निविदा आल्या आहेत. यापूर्वी या कामाच्या निविदा २६ टक्के जादा दराने आल्या होत्या. या निविदांमध्ये संगनमत झाल्याचा आरोप झाल्याने मुख्यमंत्री देवेंद्र फडणवीस यांनी वादग्रस्त निविदा रद्द करून फेरनिविदा काढण्याचे आदेश दिले होते. त्यानुसार फेरनिविदा प्रक्रिया राबविण्यात आली असून, निविदा उघडल्यानंतर त्या सरासरी ११ टक्के कमी दराने आल्याचे स्पष्ट झाले आहे. महापालिका प्रशासनाने फेरनिविदा प्रक्रिया राबविताना या कामाचे नव्याने विभागीय दरपत्रक तयार करण्याचा निर्णय घेतला. त्यानंतर नव्याने एस्टिमेट तयार करण्यात आले. नव्या आणि जुन्या एस्टिमेटमध्ये सुमारे ५०० कोटी रुपयांचा फरक होता. केवळ नव्याने एस्टिमेट तयार केल्याने पुणेकरांचे ५०० कोटी रुपये वाचले होते. त्यात जुन्या निविदा या २६ टक्के जादा दराने आल्या होत्या. त्यातही पुणेकरांचे जवळपास ४०० कोटी रुपये अतिरिक्त जाणार होते. जुन्या निविदा रद्द झाल्याने आणि फेरप्रक्रिया करण्यात आल्याने पुणेकरांचे ९०० कोटी रुपये वाचल्याचे स्पष्ट झाले आहे.