म. टा. प्रतिनिधी, पुणे
पुण्याच्या वाहतुकीची परिस्थिती दिवसेंदिवस गंभीर होत असून, आता या कोंडीने जागतिक पातळीवरही 'झेंडा' रोवला आले. एका खासगी कंपनीने जाहीर केलेल्या वाहतूक कोंडीविषयक अहवालात जगभरात सर्वाधिक वाहतूक कोंडी होणाऱ्या शहरांच्या यादीत पुणे पाचव्या स्थानी असल्याचे नमूद करण्यात आले आहे. या अहवालात प्रथमच पुण्याच्या कोंडीचा समावेश झाला आहे. या कंपनीच्या २०१८च्या अहवालात पुण्याची कोंडी अधोरेखित झाली नव्हती.
'टॉमटॉम' या कंपनीने जगभरातील ५७ देशातील ४१६ शहरांच्या वाहतुकीचा अभ्यास २०१९मध्ये केला. त्यावर आधारित 'टॉमटॉम ट्रॅफिक इन्डेक्स' हा अहवाल नुकताच जाहीर करण्यात आला आहे. त्यामध्ये भारतातील बेंगळुरू शहरातील वाहतुकीची समस्या अत्यंत भीषण असल्याचे समोर आले असून, क्रमवारीत बेंगळुरू क्रमांक एकवर राहिले आहे. बेंगळुरूच्या वाहतूक कोंडीत वाहनचालक अडकल्याने त्यांना प्रवासासाठी इतरांच्या तुलनेने ७१ टक्के अधिक वेळ लागत असल्याचे अहवालात नमूद करण्यात आले आहे. अहवालात मुंबईचा चौथा क्रमांक असून, पुणे पाचव्या क्रमांकावर आहे. मुंबई आणि पुणे या दोन्ही शहरातील वाहतूक कोंडीमुळे वाहनचालकांना प्रवासासाठी अनुक्रमे ६५ आणि ५९ टक्के अधिक वेळ लागत असल्याचे आढळून आले आहे. नवी दिल्ली आठव्या क्रमांकावर असून, तेथे वाहतुकीस ५६ टक्के विलंब होतो.
...............
\Bशुक्रवारची रात्र टाळा
\Bगेल्या वर्षातील शहराच्या वाहतुकीचा अभ्यास केल्यानंतर असे आढळून आले आहे की, शुक्रवारी रात्री आठ वाजेनंतर बहुतांश रस्त्यावर मोठ्या प्रमाणावर वाहतूक कोंडी होते. रात्री आठनंतर घराबाहेर किंवा ऑफिसातून घरी किंवा अन्य ठिकाणी जाण्यासाठी रस्त्यावर आलेल्या नागरिकांना वाहतूक कोंडीचा सामना करावा लागतो. त्यामुळे या वेळेत प्रवास करणे टाळल्यास त्रास व प्रवासाचा वेळ वाचेल, असा सल्लादेखील 'टॉमटॉम' कंपनीने अहवालाद्वारे दिला आहे.
...............
\B'वीकेंड'ला 'ट्रॅफिक जाम'\B
सरासरी वाहतूक कोंडीच्या तुलनेत 'वीकेंड'च्या दिवशी शहराला कोंडीचा सर्वाधिक फटका बसत असल्याचे दिसून आले आहे. त्यामुळे वीकेंडच्या दिवशी सकाळी प्रवासासाठी निघाल्यावर ७० टक्के अधिक वेळ लागतो, तर सायंकाळी प्रवासासाठी तब्बल ९९ टक्के अधिक वेळ लागतो, असे अहवालात म्हटले आहे.
...............
\Bमहामार्गांवरही कोंडीच\B
पुणे शहराच्या हद्दीतून जाणाऱ्या महामार्गांवरील वाहतुकीलाही कोंडीचा फटका बसत आहे. या अहवालात नमूद केल्यानुसार महामार्गांवरील कोंडीमुळे प्रवासास ४९ टक्के अधिक वेळ लागतो.
...............
पुण्याच्या वाहतुकीबाबत अहवालातील ठळक बाबी
५९ टक्के
वाहतूक कोंडीमुळे होणारा विलंब
...
४,३२,४७,८२८ किमी
अभ्यासासाठी पुण्यातील रस्त्यांची पाहणी
...
१,२६,३०,३६५ किमी
अभ्यासलेल्या महामार्गांची लांबी
...
३,०६,१७,४६३ किमी
महामार्गाव्यतिरिक्त अभ्यासलेल्या रस्त्यांची लांबी
...
४९ टक्के
महामार्गांवरील कोंडीमुळे प्रवासास लागणारा जादा वेळ
...
६३ टक्के
शहरातील कोंडीमुळे प्रवासास लागणारा जादा वेळ
...
२७ ऑक्टोबर
वाहतुकीच्या दृष्टीने २०१९मधील सर्वांत कमी कोंडीचा दिवस (३० टक्के विलंब)
...
२ ऑगस्ट
वाहतुकीच्या दृष्टीने २०१९मधील सर्वाधिक कोंडीचा दिवस (९३ टक्के विलंब)
...............