‘प्रवरा’च्या चेअरमनपदी राधाकृष्ण विखे-पाटील

म. टा. प्रतिनिधी, पुणे

नगर जिल्ह्यातील प्रतिष्ठित प्रवरा ग्रामीण एज्युकेशन सोसायटी संस्थेच्या विश्वस्त, चेअरमनपदावरून सुरू असलेल्या वादावर तूर्त पडदा पडला आहे. राधाकृष्ण विखे-पाटील यांच्यासह त्यांचे बंधू अशोक विखे पाटील यांची बाजू पुन्हा ऐकून सुनावणी घ्यावी, असे आदेश नगर येथील धर्मादाय उपायुक्तांना देण्यात आले आहेत. तोपर्यंत संस्थेच्या चेअरमनपदी माजी कृषिमंत्री राधाकृष्ण विखे-पाटील कायम राहतील, असेही धर्मादाय सहआयुक्त शिवाजीराव कचरे यांनी आदेश दिले.
नगर जिल्ह्यासह पुणे परिसरात नावाजलेली शिक्षणसंस्था म्हणून प्रवरा ग्रामीण एज्युकेशन सोसायटीकडे पाहिले जाते. माजी खासदार बाळासाहेब विखे पाटील यांनी या संस्थेची स्थापना केली होती. या संस्थेत आजमितीला साडेसात हजार कर्मचारी काम करीत असून, आणि सुमारे ४० हजार विद्यार्थी शिक्षण घेत आहेत. माध्यमिक, उच्च माध्यमिक शाळांसह अभियांत्रिकी, फार्मसी, मेडिकल कॉलेज, वास्तूविशारद, तंत्रनिकेतन, एमबीए, डीएड, बीएड, होम सायन्स या सारख्या शाखा संस्थेत आहेत.