पुण्यात दोन दिवस पावसाची शक्यता

पुण्यात दोन दिवस पावसाची शक्यता

म. टा. प्रतिनिधी, पुणे
शहर आणि परिसरात शनिवारी पावसाच्या काही सरींनी हजेरी लावली. पुण्यासह मराठवाडा, विदर्भ व मध्य महाराष्ट्रात पावसाचा जोर कमी होता. कोकण आणि मुंबईत मात्र मुसळधार पावसाची नोंद झाली. पुढील दोन दिवसांत मुंबईसह कोकणात काही ठिकाणी अतिवृष्टीची शक्यता आहे. पुण्यात पुढील दोन दिवस पावसाच्या सरींची शक्यता वर्तविण्यात आली आहे.
गुजरातची दक्षिण किनारपट्टी ते केरळ किनारपट्टीदरम्यान किनारपट्टीला समांतर कमी दाबाचा पट्टा सक्रिय आहे. गुजरातचा दक्षिण भाग ते कोकणचा उत्तर भाग या दरम्यान जमिनीवर वातावरणाच्या वरच्या थरात हवेची चक्राकार स्थिती आहे. त्याचबरोबर राजस्थानचा उत्तर भाग ते बंगालच्या उपसागरापर्यंत कमी दाबाचा पट्टा सक्रिय आहे. परिणामी किनारपट्टी भागात पावसाचा जोर अधिक असून राज्याच्या उर्वरित भागातही पावसाचे प्रमाण काहीसे वाढले आहे.
शनिवारी मुंबईसह कोकण किनारपट्टी भागात मुसळधार पाऊस झाला. सायंकाळी साडेपाचपर्यंत राज्यातील सर्वाधिक पावसाची नोंद अलिबाग येथे (१४९ मिलिमीटर ) झाली. डहाणू येथे १३४ मिमी, मुंबईत ९६ मिमी, सांताक्रूझ येथे ३५, रत्नागिरी येथे ८६, महाबळेश्वर १७, ब्रह्मपुरी येथे ४, तर यवतमाळ येथे ८ मिमी पावसाची नोंद झाली.
पुण्यात शनिवारी तुरळक सरींनी हजेरी लावली. काही उपनगरात पावसाचा जोर कमी अधिक होता. रात्री साडेआठपर्यंत शहराच्या मध्यवर्ती भागात १.२ मिलिमीटर पावसाची नोंद झाली. लोहगाव येथे एक मिमी पाऊस नोंदला गेला. पुढील दोन दिवसांत शहरात थांबून थांबून पावसाची शक्यता आहे.