राज ठाकरे यांची आज पुण्यात सभा, पोलिसांनी घातल्या 'या' अटी

म. टा. प्रतिनिधी, पुणे : महाराष्ट्र नवनिर्माण सेनेचे प्रमुख राज ठाकरे यांच्या रविवार, २२ मे रोजी होणाऱ्या सभेला पोलिसांनी सशर्त परवानगी दिली आहे. धार्मिक भावना दुखावणारी; तसेच चिथावणीखोर वक्तव्ये सभेत करू नयेत, या अटींसह परवानगी देण्यात आल्याची माहिती पोलिसांकडून देण्यात आली. स्वारगेट येथील गणेश कला क्रीडा मंच येथे सकाळी १० वाजता मनसेतर्फे ही सभा आयोजित करण्यात आली आहे. राज ठाकरे यांच्या मागील सभा; तसेच शहरात तापलेले राजकीय वातावरण पाहता पोलिसांनी सभेला सशर्त परवानगी दिली. सभेत आक्षेपार्ह वक्तव्य करू नये, भावना दुखावतील असे वक्तव्य करू नये, अशा अटी ठेवण्यात आल्या आहेत. या सभेला सशर्त परवानगी दिल्याची माहिती अतिरिक्त पोलिस आयुक्त राजेंद्र डहाळे यांनी दिली.

राज यांच्या सभेसाठी शहरातील मनसे कार्यकर्त्यांनी जोरदार तयारी केली आहे. सभास्थळासह शहराच्या विविध भागांत फलक आणि पक्षाचे झेंडे लावण्यात आले आहेत. या सभेला पुण्यासह पश्चिम महाराष्ट्रातील कार्यकर्ते उपस्थित राहणार असल्याने पोलिसांकडून रविवारी सकाळपासून स्वारगेट परिसरात मोठा बंदोबस्त ठेवण्यात येणार आहे. राज यांचा अयोध्या दौरा स्थगित झाल्याने ते या सभेत काय भूमिका मांडतात, याकडे राजकीय वर्तुळाचे लक्ष लागले आहे.