सागर रजपूतने केला प्रेयसीचा निर्घृण खून

सहा महिन्याच्या मुलीस सोडले मंदिरात; पोलिस तपासात उघड

म. टा. प्रतिनिधी, पुणे
गुजरातमध्ये पुण्यातील दोन पोलिसांवर गोळीबार करणारा गजा मारणे टोळीचा कुख्यात गुंड सागर राजपूतने प्रेयसीला बडोद्याला घेऊन जाताना धुळे परिसरात गळा दाबून खून केल्याचे समोर आले आहे. प्रेयसीने नवीन फ्लॅट घेण्यासाठी तगादा लावल्यामुळे तिचा खून केला आणि तिच्या सहा महिन्याच्या चिमुरडीला इंदूर येथील मंदिरात सोडून दिल्याची धक्कादायक माहिती तपासात समोर आली आहे.
सरोज हनुमंत चोपडे (वय २३, रा. राजविलास हाइट्स, बावधन) असे खून केलेल्या महिलेचे नाव आहे. तसेच, त्याच्याकडून अमोल बधे खून प्रकरणात वापरलेले पिस्तूल जप्त केले आहे. हे पिस्तूल गजा मारणेच्या मुळशीतील फार्महाउसमध्ये लपवून ठेवले होते, अशी माहिती पोलिस उपायुक्त पी. आर. पाटील यांनी पत्रकार परिषदेत दिली.
बडोदा येथे शोध घेण्यासाठी गेलेल्या दोन पोलिसांवर रजपूत याने गोळीबार केला होता. त्यानंतर गुजरात पोलिसांनी त्याला अटक केली. त्यानंतर पुणे पोलिसांनी त्याला पुण्यातील अमोल बधे खून प्रकरणात अटक करून तपास केला. त्यावेळी त्याने केलेल्या खुनाची माहिती पोलिसांना मिळाली. १४ डिसेंबर २०१५ रोजी सागर, सरोज आणि त्याच्या सहा महिन्याच्या मुलीसोबत कारने बडोद्याला निघाला होता. नवीन फ्लॅट घेण्यासाठी सरोजने त्याच्याकडे आग्रह धरला. त्यावरून या दोघांची कारमध्ये भांडणे झाली. त्यावेळी सागरने धुळ्याजवळ गेल्यानंतर तिचा गळा दाबून खून केला. त्यानंतर चाकूने वार करून तिचा मृतदेह झुडपात नेऊन टाकला. तेथून पुढे पाच तास प्रवास करून पहाटेच्या वेळी इंदूर येथील एका मंदिरात सहा महिन्याच्या मुलीला सोडून दिले. पोलिस कोठडीत सागरने ही माहिती दिल्यानंतर गुन्हे शाखेच्या पथकाने धुळ्याला जाऊन या प्रकरणाची चौकशी केली. त्यावेळी १५ डिसेंबर २०१५ रोजी एका महिलेचा खून झाल्याची नोंद आहे.
सरोजचा पती हनुमंत चोपडे यांची आणि सागरची पूर्वीपासून ओळख होती. त्यांनतर सागरने सरोजशी ओळख वाढवून तिच्याशी संबंध प्रस्थापित केले. तिचा ब्युटीपार्लरचा व्यवसाय होता. रजपूतला ३ सप्टेंबरपर्यंत पोलिस कोठडी सुनावण्यात आली आहे, अशी माहिती पाटील यांनी दिली.