म. टा. प्रतिनिधी, पुणे
झपताल, तीनतालाचे सादरीकरण, होली, नट भैरव रागातील रचना, बसंत रागातील वसंत ऋतूवर आधारित हवेली संगीत अशा देखण्या आणि पारंपरिक चीजांना रसिकांनी भरभरून दाद दिली. नृत्याविष्काराची ही मैफल उत्तरोत्तर रंगत गेली.
ऊर्मी कथक नृत्यालयाचा १९ वा वर्धापन दिन अण्णा भाऊ साठे स्मारक सभागृहात पार पडला. नाट्यसंस्कार कला अकादमीच्या सहकार्याने आयोजित कार्यक्रमात नृत्य सादरीकरणाने रंगत आली. महिषासुरमर्दिनीच्या श्री रामकृष्ण कवींच्या स्तवनाने कार्यक्रमाला सुरुवात झाली. अगदी नव्याने नृत्यालयात आलेल्या छोट्या मुलींना कथक नृत्यातून अभिव्यक्त व्हायला उद्युक्त करणाऱ्या, त्यांच्या भावविश्वाशी मिळत्याजुळत्या अशा दोन कथा नृत्यातून सादर झाल्या. नगरसेविका माधुरी सहस्रबुद्धे प्रमुख पाहुण्या म्हणून उपस्थित होत्या.
ऊर्मी कथक नृत्यालयाच्या गुरू विदुला कुडेकर या दर वर्षी मुलींना पारंपरिक कथक प्रदर्शनाबरोबर अभिव्यक्तीची, सर्जनशीलतेची संधी देतात. या कार्यक्रमात शास्त्राचे काटेकोर पालन आणि अभिव्यक्तीची उस्फूर्त संधी या दोन्हीचा तोल सांभाळला गेला.
कुडेकर म्हणाल्या, 'बारा-तेरा वर्षे कथकचे शास्त्रशुद्ध शिक्षण घेतल्यानंतर शिष्यांचा एकल नृत्य सादर करता येते. सर्जनशील कलात्मक आविष्कारासाठी साधना आवश्यक आहे.' टिळक महाराष्ट्र विद्यापीठातून कथक नृत्यात पदवी घेतलेल्या अलिशा आणि चिन्मयी यांनी एकल नृत्य सादर केले. चिन्मयीने गुरू पं. बिरजू महाराज रचित अर्धांग रचनेने आपली प्रस्तुती सुरू केली आणि त्यानंतर ताल चौताल सादर केला. अलिशाने ताल रूपकने सुरुवात करून दिवंगत बिंदादिनमहाराज रचित झुला सादर केला. संगीत संयोजन देवेंद्र देशपांडे यांचे होते. तबल्याची साथ अमोल माळी, पखवाज आणि ढोलकची साथ अपूर्व द्रविड, गायनाची साथ मयूर महाजन, सिंथेसायझरची साथ तुषार दीक्षित यांनी केली. सूत्रसंचालन तन्वी कोटकर यांनी केले.
-----------