म. टा. प्रतिनिधी, पुणे
बलात्कार केल्याचा आरोप असलेल्या तरुणावर मुलीने व तिच्या बापाने भरचौकात कोयत्याने वार करून खून केला. तरुणाला वाचविण्यासाठी आलेल्या आई-वडिलांवर वार केले. इंदापूर तालुक्यातील नीरा नृसिंहपूर येथे दुपारी तीनच्या सुमारास ही घटना घडली. या प्रकरणी इंदापूर पोलिसांनी खुनाचा गुन्हा दाखल केला आहे.
नीलेश नागनाथ घळके (वय १७, रा. नीरा नृसिंहपूर, ता. इंदापूर) असे खून झालेल्या तरुणाचे नाव आहे. या प्रकरणी तरुणाच्या आईने तक्रार दिली आहे. पोलिसांनी दिलेल्या माहितीनुसार, या घटनेतील आरोपी मुलीने दिलेल्या तक्रारीवरून नीलेश नागनाथ घळके व श्रीकांत पोपट घळके (रा. गणेशगाव, ता. माळशिरस, जि. सोलापूर) या दोघांविरुद्ध इंदापूर पोलिस ठाण्यात बलात्काराचा गुन्हा दाखल आहे. या गुन्ह्यात श्रीकांत घळके यास अटक करण्यात आली होती; तर मृत नीलेश अल्पवयीन असल्याने त्याला बालन्यायालयात हजर करण्यात आले होते. त्याला जामिनावर सोडण्यात आले होते. त्यामुळे मुलीचा वडील त्याच्यावर चिडून होता. तो तक्रारदार यांच्या घरी येवून कोर्टाने त्याला सोडले असले तरी मी सोडणार नाही, अशी धमकी देत होता.
यामुळे घाबरलेल्या घळके कुटुंबीयांनी नीलेशला इंदापूर येथे शिक्षणासाठी होस्टेलवर ठेवले होते. नीलेशची परीक्षा संपल्याने तो गुरुवारी दुपारी तीन वाजता घरी आला. याची माहिती मिळताच आरोपी व त्याची मुलगी घरी आले. नीलेशच्या वडिलांनी आरोपीला अडविण्याचा प्रयत्न केला. त्यावेळी आरोपीने त्यांच्यावर कोयत्याने वार केले. मुलीने तक्रारदार यांच्यावर वार केला. हा प्रकार पाहून नीलेश गावात पळाला; पण आरोपीने पाठलाग करून त्याला चौकात गाठले. त्याच्यावर कोयत्याने वार केले. आरोपीने केलेल्या वारामध्ये नीलेशच्या डाव्या हाताचा पंजा हाता वेगळा झाला. त्यात जागीच त्याचा मृत्यू झाला. भरदिवसा घडलेल्या या प्रकाराने नीरा नृसिंहपूर चौकात खळबळ उडाली. या प्रकरणी इंदापूर पोलिस अधिक तपास करत आहेत.