पोटच्या मुलीवर केला बलात्कार

म. टा. प्रतिनिधी, पिंपरी

नराधम बापाने पोटच्या बारा वर्षीय मुलीवर गेल्या दोन वर्षांपासून बलात्कार केल्याचे उघड झाले आहे. ही घटना थेरगाव येथे घडली. धक्कादायक प्रकार म्हणजे या मुलीवर हैदराबाद येथे चालत्या रेल्वेत, सोलापूर रेल्वे स्टेशनवरही अत्याचार झाला असून, तिला नग्न करून मिरचीची धुरी दिल्याचेही फिर्यादीत नमूद करण्यात आले आहे.

मुंबईतील कांदिवली येथील सामाजिक संस्थेच्या प्रतिनिधींनी याबाबत फिर्याद दिली. २०१६च्या सुरुवातीला हा प्रकार थेरगाव येथे घडल्याने हा गुन्हा तपासासाठी वाकड पोलिस ठाण्याकडे वर्ग करण्यात आला आहे. पोलिस उपायुक्त नम्रता पाटील यांनी दिलेल्या माहितीनुसार, पीडितेवर २०१६ मध्ये आणि आता २०१८ मध्ये बापानेच बलात्कार केला. त्यानंतर २०१७ मध्ये मुलीच्या नातेवाइक महिलेने आणि तिच्या मुलाने तिला हैदराबाद येथील घरात नग्न करून मिरचीची धुरी दिली, तसेच मारहाणही केली. त्यानंतर २०१७ मध्येच पीडितेवर एका अपंग व्यक्तीने हैदराबादमध्ये चालत्या रेल्वेत बलात्कार केला. त्याचबरोबर सोलापूर रेल्वेस्थानकातही मुलीवर अनोळखी व्यक्तीने बलात्कार केल्याचे फिर्यादीमध्ये नमूद करण्यात आले आहे. सहाय्यक निरीक्षक स्वामी तपास करीत आहेत.

---------