​ ५ वर्षांच्या चिमुरडीवर सामूहिक अत्याचार; आरोपी अटकेत

पिंपरी: पाच वर्षांच्या चिमुरडीवर सामूहिक बलात्कार करण्यात आल्याचा धक्कादायक प्रकार पुण्यातील कोंढवा परिसरात उघडकीस आला आहे. ऑगस्ट २०१७ पासून हा अत्याचार सुरू असून या प्रकरणात सहा ते १२ या वयोगटातील पाच अल्पवयीन मुलांना पोलिसांनी ताब्यात घेतले असून, १८ वर्षीय आरोपीला अटक करण्यात आली आहे.

चिमुरडीच्या आजीने (वय ५१) याप्रकरणी कोंढवा पोलिस ठाण्यात फिर्याद दिली आहे. वरिष्ठ निरीक्षक मिलिंद गायकवाड यांनी या प्रकरणी दिलेल्या माहितीनुसार, पीडित चिमुरडीला त्रास होऊ लागल्याने तिच्या वडिलांनी तिला डॉक्टरांकडे नेले. त्यावेळेस तपासणीनंतर गुरुवारी (२१ डिसेंबर) हा प्रकार उघडकीस आला. त्यानंतर पीडित चिमुरडीच्या कुटुंबीयांनी पोलिसांकडे धाव घेतली.

या प्रकरणात अटक करण्यात आलेल्या १८ वर्षीय आरोपीने दिलेल्या माहितीनुसार ६ वर्ष ९ महिने, १० वर्षे आणि १२ वर्षे वयाची एकूण ५ अल्पवयीन मुलेही यात सहभागी होती. पोलिसांनी सायंकाळी उशिरा या पाचही अल्पवयीन मुलांना ताब्यात घेऊन त्यांची निरीक्षणगृहात रवानगी केली. तर १८ वर्षीय तरूणाला अटक करण्यात आली आहे.

अल्पवयीन मुलीवर सामूहिक बलात्कार झाल्याच्या अनेक घटना उघडकीस आल्या आहेत. त्यापैकी भोसरी आणि निगडी पोलिस ठाण्यांतर्गत बलात्कारानंतर चिमुरडींचा खून केलेल्या दोन घटनांमधील आरोपींचा माग काढण्यात पोलिसांना अद्याप यश आलेले नाही. कोंढवा पोलिस या प्रकरणाचा तपास करीत आहेत.