म. टा. प्रतिनिधी, इंदापूर
विधानसभा निवडणुकीत राष्ट्रीय समाज पक्षाने भारतीय जनता पक्षाकडे ५७ जागांची मागणी केली आहे. 'रासप'ला दौंडची जागा सुटली असून इंदापूरची जागा मिळवण्यासाठी आपण आग्रही राहू, असे पशु संवर्धन मंत्री महादेव जानकर यांनी सोमवारी स्पष्ट केले.
इंदापुरात झालेल्या पक्षाच्या कार्यकर्ता मेळाव्यात जानकर बोलत होते. या वेळी बाळासाहेब दोडतोले, दादासाहेब केसकर, श्रद्धा भातंब्रेकर, माणिकराव दांगडे पाटील, अण्णासाहेब रुपनवर, सतीश शिंगाडे, किरण गोफणे, दिलीप धायगुडे आदी उपस्थित होते. आपल्या पक्षाच्या चिन्हावरच निवडणूक लढविण्याची भूमिकाही जानकर यांनी स्पष्ट केली. धनगर आरक्षण, ही न्यायालयीन लढाई असली, तरी सध्या राज्य सरकारने धनगर समाजासाठी अनुसूचित जमातीच्या सर्व योजना लागू करण्यासाठी एक हजार कोटी रुपयांची तरतूद केली आहे, असे जानकर म्हणाले.
.........
हर्षवर्धन यांनी मागितली उमेदवारी?
माजी मंत्री हर्षवर्धन पाटील यांनी 'राष्ट्रवादी'वर टीकास्त्र सोडून आघाडीला सोडचिठ्ठी देण्याचे सूतोवाच केले आहे. मात्र, त्यांनी अद्याप कोणत्याही पक्षात प्रवेश न करता झाकली मूठ कायम ठेवली आहे. पाटील यांनी 'रासप'कडे उमेदवारी मागितल्याचा दावा काही दिवसांपूर्वीच जानकर यांनी केला होता. त्या पार्श्वभूमीवर इंदापूरच्या जागेसाठी रासप आग्रही राहणार असल्याचे त्यांनी नमूद केले आहे. त्यामुळे पाटील कोणता झेंडा हाती घेणार, याबाबत उत्सुकता वाढली आहे.
....................