म. टा. प्रतिनिधी, पुणे
नवीन वाहनांची नोंदणी केल्यानंतर वाहनधारकांना वाहन नोंदणी प्रमाणपत्र (आरसी) मिळण्यासाठी प्रतीक्षा करावी लागत आहे. काही महिने उलटल्यानंतर वाहनधारकांनी आरटीओत येऊन चौकशी केल्यानंतर, त्यांच्या वाहनाची 'हायसिक्युरिटी नंबर प्लेट' अपडेट न केल्यामुळे 'आरसी' छपाई रखडल्याची बाब समोर येत आहे.
केंद्रीय रस्ते वाहतूक व महामार्ग मंत्रालयाने वाहनांना 'हाय सिक्युरिटी नंबर प्लेट' (एचएसआरपी) बसविणे बंधनकारक केले आहे. या नंबर प्लेटवर 'यूआयडी' नंबरचा समावेश करण्यात आला आहे. प्रत्येक वाहनाला समोरील आणि मागील बाजूस नंबर प्लेट असते. या दोन्ही नंबर प्लेटवरील 'यूआयडी' क्रमांक हा भिन्न असतो. वाहनांची विक्री केल्यानंतर वाहनाचा इंजिन क्रमांक, चासी क्रमांक, खरेदीदाराचे नाव, पत्ता आदी माहिती वाहन\R प्रणालीत नमूद करण्याची जबाबदारी वाहन वितरकाची असते. बाहेरच्या शहरातून किंवा अन्य आरटीओच्या कार्यक्षेत्रातून वाहन खरेदी करून, ते वाहन कायमस्वरूपीच्या नोंदणीसाठी पुण्यात आणले जाते. त्यापूर्वी त्याचे त्या वाहनाची बाहेरच्या आरटीओत तात्पुरती नोंदणी केली जाते. मात्र, ते वाहन पुण्यात आणताना त्यास 'हायसिक्युरिटी नंबर प्लेट' बसविली जात नाही. तसेच, त्यावरील 'यूआयडी' क्रमांक वाहन प्रणालीत नमूद केला जात नाही. पुणे आरटीओत नोंदणीची प्रक्रिया पार पाडतानाही या नंबर प्लेटची माहिती घेतली जात नाही. ज्या वाहनांच्या 'यूआयडी' क्रमांक वाहन प्रणालीत पडताळणी होत नाही, त्यांच्या 'आरसी'ची छपाई प्रक्रिया पूर्ण करता येत नाही. त्या प्रलंबित राहतात. या प्रकारे 'आरसी' प्रलंबित राहिलेले वाहनधारक आरटीओकडे तक्रार घेऊन येत आहेत.
\Bआरटीओकडून दुर्लक्ष ?
\Bदुसऱ्या आरटीओत तात्पुरती नोंदणी केलेल्या वाहनांची पुण्यात नोंदणी करताना, त्या वाहनांना 'हायसिक्युरिटी नंबर प्लेट' बसविले आहे किंवा नाही, ते वाहन प्रणालीवर अपडेट केले आहे किंवा नाही, याची खातरजमा आरटीओ प्रशासनाकडून केली जात नाही का, असा प्रश्न उपस्थित होत आहे. वाहनधारक दोन-तीन महिन्यानंतर आरटीओत येतो, त्या वेळीच त्यांना ही बाब समजते. सामान्य नागरिकांना आरसी छपाई बाबतचे नियम व अटी माहिती नाही. आरटीओकडून दुर्लक्ष होत असल्याने ही समस्या निर्माण होत असल्याचे वाहनधारकांचे म्हणणे आहे.