मावळातील शाळांत ग्रंथालये सुरू करण्याचा उपक्रम
म. टा. प्रतिनिधी, पुणे
पुण्यालगतच्या मावळ भागात गेलात, तर अनेक शाळांमध्ये छोटेखानी ग्रंथालये सुरू झालेली दिसतील. या शाळांमधील विद्यार्थी वेगवेगळ्या कथा, कविता आणि लेखांचे वाचन करून आपला शब्दसंग्रह वाढवत आहेत... शिक्षण क्षेत्रात काम करण्याचा वसा घेतलेल्या चेतन परदेशी या तरुणाने 'एस फॉर स्कूल' या उपक्रमांतर्गत सुरू केलेल्या वाचनालयाच्या मोहिमेचे हे फलित आहे.
चेतनने एक वर्षापूर्वी 'एस फॉर स्कूल' हा उपक्रम सुरू केला. आपल्या मित्रांच्या सहकार्याने त्याने एक चमू तयार करून मुलांच्या शिक्षणाला पोषक असे अनेक कार्यक्रम आयोजिण्यास सुरुवात केली. 'मोबाइल लायब्ररी'चा उपक्रम हा त्यातीलच एक उपक्रम आहे. यासाठी मावळ भागातील ग्रामीण शाळांची निवड करण्यात आली. शाळांमध्ये वेगवेगळ्या विषयांची पुस्तके असलेले छोटेखानी ग्रंथालय सुरू करण्याचा त्याचा मानस असून, पहिल्या टप्प्यामध्ये ७० शाळांमध्ये ही ग्रंथालये उभारली जाणार आहेत. पुढील टप्प्यामध्ये २७० शाळांपर्यंत पोहोचण्याचे चेतनचे उद्दिष्ट आहे. आतापर्यंत सात-आठ शाळांमध्ये ग्रंथालये उभारण्यात आली आहेत.
चेतन आणि त्याचे सहकारी समाजातील दानशूर व्यक्तींना आवाहन करून त्यांच्या मदतीने ही ग्रंथालये उभारत आहेत. यामध्ये ते इच्छुक देणगीदारांना थेट पुस्तके खरेदी करून द्यायला सांगतात आणि ती पुस्तके शाळांपर्यंत पोहोचवतात. चेतनबरोबर तन्वा दुबे, आशिष थावरानी, निशांत ढवळे, वैभव दरवडे, श्रीधर पोमण, दीक्षा डोकाले हे तरुण या उपक्रमात सक्रिय सहभागी आहेत.
ग्रामीण भागातील मुले शाळांकडे वळावीत, यासाठी वेगवेगळे उपक्रम आयोजित करण्यावर भर दिला जात आहे. ग्रंथालयाची संकल्पनादेखील त्यापैकीच एक असून, आम्ही ३५० हून अधिक शाळांपर्यंत पोहोचण्याचा प्रयत्न करणार आहोत.
- चेतन परदेशी
संस्थापक, 'एस फॉर स्कूल'
मदतीचे आवाहन
'चेतन आणि त्यांचे सहकारी ग्रंथालयांची मोहीम उभारण्यासाठी समाजात मदतीचे आवाहन करीत आहेत. ज्या व्यक्तींना शक्य आहे, अशांनी त्यांना एक हजार रुपये किमतीची पुस्तके द्यावीत,' असे आवाहन चेतन व त्यांच्या सहकाऱ्यांतर्फे करण्यात आले आहे. अधिक माहितीसाठी ८७९३६६३०६५ या क्रमांकावर संपर्क करता येईल.
---