म. टा. प्रतिनिधी, पुणे
तेल कंपन्यांनी एक एप्रिल रोजी वाढविलेल्या पेट्रोलच्या दरानंतर शहरातील अलीकडच्या काळातील सर्वोच्च दर गाठले आहेत. पुणे आणि पिंपरी-चिंचवड शहरात आज, दोन एप्रिलला पेट्रोल प्रतिलिटर ८१ रुपये ४८ पैसे आणि डिझेल प्रतिलिटर ६७.६५ पैसे विक्री होणार आहे. हे दर गेल्या दोन ते तीन वर्षातील सर्वाधिक असल्याचे मत पेट्रोल डीलर असोसिएशनच्या पदाधिकाऱ्यांनी व्यक्त केले आहे.
गेल्या काही दिवसांपासून पेट्रोल आणि डिझेलच्या दरात सातत्याने होणारी वाढ कायम आहे. रविवारी पुण्यात पेट्रोलचे दर सुमारे ८१ रुपये ४० पैसे आणि डिझेलचे दर ६७ रुपये ५५ पैसे होते. त्यामध्ये सोमवारी सकाळपासून पेट्रोलचे दर १० पैसे व डिझेल १२ पैशांनी वाढणार आहेत. 'मायक्रो प्रायसिंग'मुळे शहरातील पेट्रोल पंपांवर पेट्रोल पंपावर दरामध्ये काही पैशांचा फरक असतो. पेट्रोल डीलर असोसिएशनचे उपाध्यक्ष सागर रुकारी यांनी दिलेल्या माहितीनुसार, सोमवारी पेट्रोलची ८१ रुपये ४८ पैसे आणि डिझेल ६७ रुपये ६५ पैसे दराने विक्री होणार आहे. हे दर गेल्या काही वर्षातील सर्वोच्च दर असल्याचे त्यांनी स्पष्ट केले.
तेल कंपन्यांच्या वेबसाइटवर प्रसिद्ध करण्यात आल्यानुसार, पुण्यात जानेवारी २०१७ रोजी ७६ रुपये ९१ पैसे दर होते. एप्रिलमध्ये ७२ रुपये ५४ पैसे, जुलैमध्ये ७४ रुपये १८ पैसे, ऑक्टोबरमध्ये ७५ रुपये ६० पैसे दर होते. जानेवारी २०१८ मध्ये पेट्रोलच्या दराने ८० रुपयाचा टप्पा ओलांडला. आता ते प्रतिलिटर ८२ रुपये प्रतिलीटरच्या मार्गावर आहे. आंतरराष्ट्रीय बाजारात कच्च्या तेलाचे दर वाढल्याने पेट्रोल, डिझेलच्या दरात वाढ होत असल्याचे सांगण्यात येत आहे.
....