म. टा. प्रतिनिधी, पुणे
चितळे उद्योग समूह आणि रिसायकल प्लॅटफॉर्म यांनी प्लास्टिक पुनर्निर्मितीसाठी कार्यान्वित केलेल्या 'रिलूप' योजनेची सुरुवात जागतिक पर्यावरण दिनापासून होणार आहे. याअंतर्गत शहरातील ग्राहकांकडून दुधाच्या पिशव्या आणि अन्य प्लास्टिक गोळा करण्याची यंत्रणा उभी केली जाणार आहे. तसेस, ग्राहकांनी एक किलो पिशव्या दिल्यानंतर त्यांच्या मोबाइल वॉलेटमध्ये २० पॉइंट्स (वीस रुपये) जमा होणार असून, त्याद्वारे ई-कॉमर्स वेबसाइटवरून खरेदी करता येणार आहे.
पन्नास मायक्रॉनपेक्षा जास्त जाडीचे प्लास्टिक वापरणे बंधनकारक करण्यात आले आहे; परंतु ५० मायक्रॉनपेक्षा जास्त जाडीचे प्लास्टिक ग्राहकाकडून एकत्र करून त्याची विल्हेवाट लावण्यासाठी हा पुढाकार घेण्यात आला आहे. हडपसर परिसरात प्रायोगिक तत्त्वावर ही यंत्रणा कार्यान्वित करण्यात येणार आहे. त्यासाठी २३० कलेक्शन सेंटर असतील, अशी माहिती चितळे समुहातर्फे अनंत, अतुल, पुष्कर व केदार चितळे आणि रिसायकल कंपनीचे संचालक अभिषेक देशपांडे आणि चेतन बारेगर यांनी दिली. 'यूझेडईडी' या मोबाइल अॅपद्वारे प्लास्टिक कलेक्शनची यंत्रणा उभारण्यात आली आहे. हे मोबाइल अॅप गुगल प्ले स्टोअर आणि अॅप स्टोअरमध्ये उपलब्ध आहे. ग्राहकाच्या घरातील दुधाच्या धुवून कोरड्या केलेल्या पिशव्या आणि इतर खाद्यपदार्थाचे धुतलेले प्लास्टिक ग्राहकाने त्यांच्या घराजवळील कलेक्शन सेंटरवर जमा करावे. त्या सेंटरची माहिती 'अॅप'मध्ये आहे. ग्राहकाने जमा केलेल्या प्लास्टिकच्या बदल्यात ग्राहकास पॉइंट्स मिळतील. ते पॉइंट्स ग्राहक 'रिडीम' करून त्या बदल्यात खरेदी करू शकतात, असे देशपांडे यांनी सांगितले.