म. टा. प्रतिनिधी, पुणे
महापालिकेच्या ताफ्यात सुमारे ९०० वाहने असून त्यांच्या देखभाल दुरुस्तीसाठी १०० फिटर नेमणुकीस आहेत. असे असतानाही महापालिका अधिकारी, पदाधिकारी यांच्या चारचाकी वाहनांच्या दुरुस्तीचे काम एका खासगी मोटार कंपनीला देण्यात आले आहेत. पदाधिकारी, अधिकाऱ्यांसाठी घेण्यात आलेल्या नवीन कारची दुरुस्ती महापालिकेच्या फिटर्सला येत नसल्याचा दावा करण्यात येत आहे. मात्र, त्याच वेळी महापालिकेकडून खरेदी करण्यात येत असलेले कोट्यवधी रुपयांचे स्पेअरपार्ट नेमके कुठे बसविले जातात, असा प्रश्न या निमित्ताने उपस्थित झाला आहे.
कचरा वाहतूक करण्यासाठीचे वाहने, टेम्पो, जीप तसेच विविध प्रकारची ९०० वाहने सध्या महापालिकेच्या ताब्यात आहेत. मोटार वाहन विभागाकडे या वाहनांच्या दुरुस्तीसाठी १०० फिटर नेमणुकीस आहेत. असे असतानाही महापालिकेच्या वाहनांची दुरुस्ती करण्याची जबाबदारी एका खासगी कंपनीला देण्यात आली आहे. या ठिकाणी वाहनांची नेमकी काय दुरुस्ती केली याची माहितीही चालकांना व्यवस्थित देण्यात येत नाही. वाहन दुरुस्तीला सोडल्यानंतर ते वेळेत मिळत नाही. इंग्रजीत असलेल्या बिलांवर या चालकांच्या सह्या घेतल्यानंतर ती बिले वाहन विभागांकडून अदा करण्यात येतात. त्यामुळे कशाचाच कसाला मेळ बसत नसल्याने महापालिकेचे चालकही त्रस्त झाले आहेत. या दुरुस्तीसाठी तसेच स्पेअरपार्ट खरेदीसाठी कोट्यवधी रुपयांचा खर्च येत असल्याने या सावळ्या गोंधळावर अंकुश ठेवण्याची मागणी होऊ लागली आहे.
\B
'ती वाहने स्क्रॅप करा'
\Bमहापालिकेच्या ताफ्यात असलेल्या अॅम्बेसेडर कार सुस्थितीत राहिलेल्या नाहीत. या कार वारंवार बिघडत असून त्यांच्या नादुरुस्तीचे प्रमाणही लक्षणीय आहे. त्यांना लागणारे इंधन आणि दुरुस्तीचा खर्च पाहता या कार 'पांढरा हत्ती' बनल्या आहेत. मात्र, ही वाहने स्क्रॅप न करता तशीच वापरण्यात येत आहेत. या वाहनांच्या दुरुस्तीपोटी मोठी रक्कम खर्च झाली असून त्यापोटी संबंधित 'मालामाल' झाले आहेत. मात्र, हे पांढरे हत्ती पोसण्याची जबाबदारीच काही व्यक्तींनी घेतल्याचे चित्र सध्या महापालिकेत दिसते आहे. त्यामुळे देखभाल दुरुस्ती तसेच इंधनाचा खर्च मोठ्या प्रमाणात येणारी वाहने विकणे अथवा स्क्रॅप करण्याची गरज भासते आहे.
............
\Bफिटर आणि कार्यक्षमता
\Bमहापालिकेच्या वाहन विभागाकडे १०० फिटर नेमणुकीस असल्याने या ठिकाणीची यंत्रणा अधिक सक्षम आणि कार्यक्षम करणे आवश्यक आहे. येथील फिटर व्यक्तींना आधुनिक प्रशिक्षण देत नवीन वाहनांची दुरुस्ती येथे करणे शक्य आहे. मात्र, तसे न करता येथील कर्मचाऱ्यांना कामे न देता खासगी कंपन्यांकडून कामे करून घेण्यात येत आहेत. याबाबत महापालिकेने धोरणात्मक निर्णय घेण्याची आवश्यकता आहे.
...............