म. टा. प्रतिनिधी, पुणे
उपराष्ट्रपती व्यंकय्या नायडू गुरुवारी (दि. २६) पुणे दौऱ्यावर येणार असल्याने त्यांचा ताफा जाणारे रस्ते खड्डे आणि गतिरोधकमुक्त करण्याचे आदेश जिल्हाधिकारी नवल किशोर राम यांनी पुणे महापालिकेला दिले आहेत. महापालिकेने केलेल्या कामाची पाहणी जिल्हा प्रशासनाकडून केली जाणार आहे.
जिल्हाधिकारी राम यांनी याबाबतचे पत्र महापालिका आयुक्त सौरभ राव यांना पाठविले आहे. उपराष्ट्रपती नायडू हे येत्या गुरुवारी बालगंधर्व रंगमंदिर येथे आयोजित केलेल्या एका कार्यक्रमासाठी येणार आहेत. उपराष्ट्रपती नायडू यांचे लोहगाव विमानतळावर आगमन होणार असून, तेथून ते औंध रस्त्यावरील राजभवन येथे जाणार आहेत. येथून जंगली महाराज रस्त्यावरील बालगंधर्व रंगमंदिर येथील कार्यक्रमाला उपस्थित राहणार आहेत. हा कार्यक्रम झाल्यानंतर याच रस्त्याने त्यांचा ताफा मार्गस्थ होणार आहे. त्यामुळे या मार्गातील रस्ते आणि गतिरोधक हटविण्याच्या सूचना जिल्हाधिकाऱ्यांनी दिल्या आहेत. रस्ते आणि गतिरोधक काढण्याचे काम पूर्ण झाल्यावर जिल्हा प्रशासनाकडून पाहणी केली जाणार असल्याचे प्रशासनाकडून सांगण्यात आले.