म. टा. प्रतिनिधी, पुणे
'आगामी विधानसभा निवडणुकीत शिवसेनेबरोबर युती केली जाणार असून, पाच जागांची मागणी केली आहे. शिवसेनेच्या धनुष्यबाण या चिन्हावर पक्षाचे उमेदवार निवडणूक लढविणार आहेत,' असे रिपब्लिकन जनशक्ती पक्षाचे अध्यक्ष अर्जुन डांगळे यांनी सांगितले.
रिपब्लिकन जनशक्ती पक्षाच्या राज्य कार्यकारिणीची बैठक पुण्यात झाली. त्यामध्ये आगामी विधानसभा निवडणुकीतील व्यूहरचनेची चर्चा करण्यात आली. त्यानंतर पत्रकार परिषदेत डांगळे यांनी ही माहिती दिली. या वेळी पक्षाचे प्रदेशाध्यक्ष शैलेंद्र मोरे उपस्थित होते.
डांगळे म्हणाले, 'रिपब्लिकन जनशक्ती आणि शिवसेना यांची वैचारिक बैठक वेगळी असली, तरीही शिवसेनेबरोबर युती केली जाणार आहे. त्यासाठी पाच जागांची मागणी केली आहे. त्यामध्ये श्रीरामपूर, धारावी, देवळाली, फलटण आणि मोहोळ या विधानसभा मतदारसंघांचा समावेश आहे.'
'रिपब्लिकन जनशक्ती हा मान्यताप्राप्त राजकीय पक्ष नसल्याने पक्षाला निवडणूक चिन्ह नाही. त्यामुळे शिवसेनेच्या धनुष्यबाण चिन्हावर निवडणूक लढविण्यात येणार आहे,' असेही डांगळे म्हणाले. दरम्यान, विधानपरिषदेच्या उपसभापती नीलम गोऱ्हे यांचा पक्षाच्या वतीने या वेळी सत्कार करण्यात आला.