​ ‘ससून’ची सेवा सुरळीत

पाच दिवसांच्या संपानंतर निवासी डॉक्टर हजर

म. टा. प्रतिनिधी, पुणे

निवासी डॉक्टरांच्या मागण्या मान्य झाल्यानंतर शनिवारी मध्यरात्री अनेक डॉक्टर हजर झाले. त्यामुळे ससून हॉस्पिटलची वैद्यकीय सेवा सकाळपर्यंत पूर्वपदावर आली. शनिवारी दिवसभरात बाह्यरुग्ण विभागात (ओपीडी) फारशी गर्दी नव्हती. मात्र, डॉक्टर हजर झाल्याने आंतररुग्ण विभागातील पेशंटना दिलासा मिळाला.
निवासी डॉक्टरांच्या सुरक्षेच्या कारणास्तव ससूनसह राज्यातील सरकारी मेडिकल कॉलेजच्या डॉक्टरांनी संप पुकारला होता. मुंबई हायकोर्टासह राज्य सरकारने संप मागे घेण्याचे आवाहन केले. परंतु, या दोन्ही यंत्रणेला निवासी डॉक्टरांनी दाद दिली नाही. अखेर कारवाईचा बडगा उगारण्याचे आदेश हायकोर्टाने दिले. त्यामुळे निवासी डॉक्टरांनी संप मागे घेत असल्याचे शुक्रवारी रात्री जाहीर केले.
गेल्या पाच दिवसांपासून ससूनमध्ये निवासी डॉक्टर उपलब्ध नव्हते. त्याचा फटका ओपीडीला येणाऱ्या पेशंटना बसला. शनिवारी सकाळपासूनच वैद्यकीय सेवा सुरळीत झाली. परंतु, शनिवारी सुट्टीचा दिवस असल्याने पेशंटची फारशी गर्दी दिसली नाही. दररोज दोन हजारांहून अधिक पेशंट ओपीडीत उपचारासाठी येतात. परंतु, संपामुळे ही संख्या निम्म्यावर आली. शनिवारी नेहमीपेक्षा पेशंटची संख्या कमीच होती. आंतररुग्ण विभागातही उपचार घेणाऱ्या पेशंटची संख्या घटल्याचे दिसून आले.
सोनोग्राफी, सीटी स्कॅन, एमआरआयसारख्या रोगनिदान सुविधांसाठी निवासी डॉक्टरांच्या उपस्थितीमुळे गर्भवतींसह मेंदूसह डोक्याच्या आजाराच्या पेशंटना दिलासा मिळाला. तातडीच्या वैद्यकीय सेवा संपकाळातही सुरू होत्या. मात्र, शनिवार आणि रविवारी सुट्टी असल्याने पेशंटची गर्दी कमी असल्याचे प्रशासनाने स्पष्ट केले. आरोग्य विभागाकडून आलेल्या २२ डॉक्टरांना पुन्हा खात्याच्या सेवेत पाठविण्यात आले. संप मिटल्याच्या पार्श्वभूमीवर सोमवारी पेशंटची गर्दी वाढण्याची शक्यता आहे.
‘शुक्रवारी रात्री बारा वाजता निवासी डॉक्टर सेवेवर परतले. ज्या निवासी डॉक्टरांची कॅज्युलिटी, आयसीयू आदी विभागांमध्ये रात्रपाळी होती; ते रात्रीच सेवेत हजर झाले. उर्वरित डॉक्टरांवर विविध विभागांच्या ओपीडीची जबाबदारी सोपविण्यात आली; ते शनिवारी सकाळी रूजू झाले,’ असे निवासी डॉक्टरांनी सांगितले.