म. टा. प्रतिनिधी, पिंपरी
पंतप्रधान आवास योजनेंतर्गत पुनर्वसनास विरोध दर्शविण्यासाठी दापोडीतील रहिवाशी संघर्ष कृती समितीने पिंपरी-चिंचवड महापालिकेवर शनिवारी मोर्चा काढला.
केंद्र सरकारच्या पंतप्रधान आवास योजनेंतर्गत पिंपरी-चिंचवड झोपडपट्टी निर्मूलन आणि पुनर्वसन प्रकल्पानुसार दापोडी येथील झोपडपट्टीत योजना राबविण्यात येणार आहे. त्यामुळे झोपडपट्टीधारकांचे पुनर्वसन होणार आहे. परंतु, त्याला विरोध दर्शवित स्थानिक रहिवाशांनी आंदोलनाचा पवित्रा स्वीकारला आहे. वर्षानुवर्षे स्वतःच्या नावावर घरपट्टी आणि सातबारा असलेल्या जयभीमनगरच्या उताऱ्यावर झोपडपट्टीचे आरक्षण टाकून पुनर्वसन प्रकल्प राबविण्यात येऊ नये. या प्रकल्पात फसवणूक केल्याचा आरोप नागरिकांनी केला आहे.
ज्या घरमालकांकडे एक ते चार गुठ्यांच्या जागेपेक्षा जास्त मालकी हक्क आहे, अशांना सरकारकडून केवळ २६९ चौरस फूट आकाराची घरे देऊन विकासाच्या नावाखाली नागरिकांची आर्थिक लूट करण्यात येत आहे. पालिकेच्या प्रवेशद्वाराजवळ नागरिकांनी ठिय्या मांडला होता. यामध्ये जयभीमनगर, लिंबारे वस्ती, सिद्धार्थनगर परिसरातील नागरिकांनी सहभाग घेतला.