म. टा. प्रतिनिधी, पुणे
रांगेत रिक्षा लावण्यावरून झालेल्या वादावादीतून दमदाटी केल्याने रिक्षाचालकाने गळफास घेऊन आत्महत्या केल्याची धक्कादायक घटना सोमवारी दुपारी जांभूळवाडी परिसरात घडली. रिक्षाचालकास आत्महत्येस प्रवृत्त केल्याप्रकरणी एकाला भारती विद्यापीठ पोलिसांनी अटक केली आहे.
सुनील रामचंद्र भरंगडे (वय ४७, रा. कात्रज ) असे आत्महत्या केलेल्या रिक्षाचालकाचे नाव आहे. या प्रकरणात सचिन दत्तात्रय अभंगराव (वय ३०, रा. दत्तनगर, आंबेगाव बुद्रुक) याला अटक करण्यात आली आहे. पोलिसांनी दिलेल्या माहितीनुसार, सुनील हे रिक्षाचालक होते. १५ दिवसांपूर्वी कात्रज रिक्षा स्टँडवर रांगेत रिक्षा लावताना त्यांची सचिनसोबत वादावादी झाली होती. त्या वेळी सचिनने 'आजपासून तुझी उलटी गिनती सुरू कर, तुला आणि तुझ्या मुलाला जीवे मारून टाकीन,' अशी धमकी सुनील यांना दिली होती. त्यामुळे घाबरलेल्या सुनील यांनी सोमवारी दुपारी दोन वाजण्याच्या सुमारास जांभूळवाडी दरीपूल परिसरातील झाडाला गळफास घेऊन आत्महत्या केली. या प्रकरणात सहायक पोलिस निरीक्षक ए. आर. कवठेकर अधिक तपास करीत आहेत.
पार्किंगवरून दोघांवर कोयत्याने वार
दत्तवाडीतील 'शिवदर्शन' इमारतीतील हेअर सलून दुकानासमोर मोटार पार्किंग करण्याच्या वादातून दोघांवर कोयत्याने वार केल्याची घटना रविवारी रात्री घडली. या प्रकरणात वार करणाऱ्या चौघांना दत्तवाडी पोलिसांनी अटक केली आहे. पृथ्वीराज मिलिंद बेंद्रे (वय १९), मिलिंद किसनराव बेंद्रे (वय ५४, दोघेही रा. शिवदर्शन, तावरे कॉलनी), सिद्धार्थ संजय पलंगे (वय २०, रा. धनकवडी), महेश श्यामसुंदर जमदाडे (वय १९, रा. बालाजीनगर, धनकवडी) अशी अटक करण्यात आलेल्यांची नावे आहेत. या प्रकरणात सुनील पिसे (वय ३०, पर्वती) यांनी तक्रार दिली आहे. या घटनेत धनंजय डिंबळे असे जखमी झालेल्याचे नाव आहे. पोलिसांनी दिलेल्या माहितीनुसार, दोन दिवसांपूर्वी रात्री अकरा वाजण्याच्या सुमारास सुनील शिवदर्शन परिसरातील 'प्रिन्स हेअर कटिंग'च्या दुकानासमोर मित्र धनंजयसोबत गप्पा मारत उभा होता. त्या वेळी तीन साथीदारांसाबेत पृथ्वीराज त्या ठिकाणी मोटार घेऊन आला. सुनील रस्त्यावर उभा असल्यामुळे पृथ्वीराजला मोटार पार्किंग करण्यास अडचण निर्माण झाली. त्यामुळे पृथ्वीराज यांच्यामध्ये वादावादी झाली. त्याचा राग आल्यामुळे पृथ्वीराजने मोटारीतून कोयता बाहेर काढून सुनीलवर वार केले. तर इतर तिघांनी धनंजयवर कोयत्याने वार करून जखमी केले. या प्रकरणात सहायक पोलिस निरीक्षक एस. एस. सलगर करीत आहेत.