पेट्रोल पंपावर दरोडा; २७ लाख लुटले!

पुणे: येथील बिबवेवाडी-कोंढवा रोडवरील आम्रपाली पेट्रोल पंपावर दरोडा टाकून चोरट्यांनी तब्बल २७ लाखांची रोकड लुटल्याची घटना घडली आहे. या घटनेनंतर पोलीस घटनास्थळी पोहोचले असून चौकशी सुरू आहे.

सकाळी पावणे बाराच्या सुमारास ही घटना घडली. पेट्रोल पंपावरील कर्मचारी रोकड बँकेत भरण्यासाठी कारनं निघाले असताना हा प्रकार घडला. त्यांच्याकडं गेल्या तीन दिवसांपासून जमलेले एकूण २७ लाख रुपये होते. अचानक दोन दुचाकीस्वारांनी त्यांची गाडी अडवली आणि त्यातील कर्मचाऱ्यांवर कोयत्यानं वार केले. त्यानंतर चोरटे रोकड लुटून पसार झाले. दोघांपैकी एकानं स्वत:ची दुचाकीही घटनास्थळीच सोडली. पोलीस या प्रकरणी अधिक तपास करत आहेत.