म. टा. प्रतिनिधी, पुणे
चौकात सिग्नलला वाहतूक पोलिसांऐवजी एखादा रोबोट वाहतूक नियमनाचे काम करत असेल, तर आश्चर्य वाटू देऊ नका. कारण, लवकरच पुणे पोलिसांना वाहतूक नियमानाच्या कामात रिमोटवरील रोबोट मदत करणार आहे. सध्या तरी हा रोबोट प्रायोगिक तत्त्वावर काही चौकांत काम करणार आहे. त्याचे काम पाहण्याची संधी उद्या, बुधवारपासून नागरिकांना मिळणार आहे. त्याचे काम व्यवस्थित झाल्यास या रोबोटचा वापर पोलिस करणार आहेत.
शहरातील वाहतूक सुरळीत आणि सुरक्षित चालावी म्हणून वाहतूक शाखेकडून वेगवेगळे प्रयत्न केले जातात. नियमभंग करणाऱ्यांवर कारवाईबरोबरच प्रबोधन देखील केले जाते. सध्या वाहतुकीचा प्रश्न वाढत आहे. त्या प्रमाणात वाहतूक पोलिसांकडे मनुष्यबळ कमी आहे. त्यामुळे प्रायोगिक तत्त्वावर काही चौकांतील वाहतुकीचे नियमन रोबोटद्वारे करता येऊ शकते का, हे पुणे वाहतूक पोलिस पाहणार आहे. पुण्यातील रोबोटिक्स मेकर लॅबच्या विद्यार्थ्यांनी तयार केलेला हा रोबोट उद्या, बुधवारपासून काही चौकांत काम करताना दिसेल. पुण्यातील विद्यार्थ्यांनी केलेल्या या रोबोटचा वापर हैदराबाद पोलिस करत आहेत. हैदराबादमधील काही चौकांत हा रोबोट वाहतूक नियमानाचे काम करत आहे. पुणे देखील आयटी हब म्हणून ओळखले जाते. या ठिकाणीही या रोबोटद्वारे काम करण्याचा प्रयोग केला जाणार आहे.
रस्ता सुरक्षा सप्ताहात रोबोटची चाचणी यशस्वी झाल्यानंतर त्याचा वाहतूक पोलिसांना चांगला फायदा होणार आहे. हा प्रयोग यशस्वी झाल्यास रोबोटचा वापर वाहतूक पोलिसांकडून करण्यात येईल. चौकात एका ठिकाणी बसून रिमोटद्वारे चौकातील वाहतुकीचे रोबोटद्वारे नियमन करता येणार आहे. सध्या एक रोबोट पुणे शहरातील विविध चौकांत काम करतानाचे प्रात्याक्षिक नागरिकांना पाहता येईल. तसेच, हा रोबोट तयार करणाऱ्या विद्यार्थ्यांचा आज, मंगळवारी सायंकाळी पोलिस आयुक्तालयात वाहतूक शाखेच्या कार्यालयात आयुक्त डॉ. के. व्यंकटेशम यांच्या हस्ते सत्कार करण्यात येणार आहे. त्यानंतर नागरिकांना त्याचे प्रात्याक्षिक पाहायला मिळेल, अशी माहिती वाहतूक शाखेच्या उपायुक्त तेजस्वी सातपुते यांनी दिली.