रॉक संगीतामध्ये शिव्या, आक्रमकता असणारच

रॉक संगीतामध्ये शिव्या, आक्रमकता असणारच

म. टा. प्रतिनिधी, पुणे
‘पॉप, रॉक संगीत म्हणजे गोंगाट,’ असे आपल्याला वाटते; पण ८० टक्के लोकांना तसे वाटत नाही. त्यांना ते संगीत आवडते. कदाचित संगीताच्या धारणेमुळे आपला तसा समज होत असावा. रॉक हे विद्रोहाचे संगीत आहे. त्यामुळे त्यामध्ये शिव्या, आक्रमकता असणारच,’ असे मत लेखक, संगीतकार डॉ. आशुतोष जावडेकर यांनी शुक्रवारी व्यक्त केले.
साहित्यप्रेमी भगिनी मंडळातर्फे ज्येष्ठ कवी, शिक्षणतज्ज्ञ ग. ह. पाटील यांच्या स्मृतिदिनानिमित्त डॉ. जावडेकर यांच्या मुलाखतीचा कार्यक्रम महाराष्ट्र साहित्य परिषदेच्या माधवराव पटवर्धन सभागृहात रंगला. डॉ. उज्ज्वला गोखले यांनी त्यांच्याशी संवाद साधला. या वेळी मंडळाच्या कार्यकारी विश्वस्त डॉ. मंदा खांडगे यांचा सत्तर वर्षे पूर्ण झाल्यानिमित्त रागिणी पुंडलिक यांच्या हस्ते सत्कार करण्यात आला. मंडळाच्या विश्वस्त मंजिरी ताम्हणकर, कार्यकारी विश्वस्त डॉ. कल्याणी दिवेकर, डॉ. नीलिमा गुंडी, सुजाता पवार, दीपाली बोधे या वेळी उपस्थित होत्या.
जावडेकर म्हणाले, ‘दु:खाच्या क्षणी शास्त्रीय संगीत व रॉक संगीत हेच आपल्या मनाला शांत करू शकते. पॉप संगीत हे खुणावणारे असते; तसेच या संगीत प्रकाराचा हेतू स्वच्छ असतो. शास्त्रीय संगीत हेच श्रेष्ठ, तर उपशास्त्रीय त्याच्या खाली व पॉप, रॉक संगीत वाईट असे नसते. शास्त्रीय व पॉप हे संगीत प्रकारच असून जगभरातील संगीताचे सर्व प्रकार चांगले आहेत. ते शेवटी मानवी मनाला स्पर्श करतात.’
‘ललित व ललितेतर साहित्य ही विभागणी जशी चुकीची आहे, तशीच संगीताची विभागणी चुकीची आहे,’ याकडे त्यांनी लक्ष वेधले. ‘पॉप, रॉक संगीताचा आपल्या प्रवाहात मिलाफ होत असून ही संगीतासाठी चांगली बाब आहे, अन्यथा साचलेपण येण्याचा धोका असतो. एक-दोन गायिकांची, संगीतकारांची हुकूमत असणे संगीतासाठी घातक ठरते,’ यावर त्यांनी बोट ठेवले. सूत्रसंचालन शलाका माटे यांनी केले.