छत नादुरुस्तच

आरटीओतील लर्निंग लायसन्स विभागाची दुरवस्था
म. टा. प्रतिनिधी, पुणे
गेल्या वर्षी पावसाळ्यात प्रादेशिक परिवहन कार्यालयातील लर्निंग लायसन्स विभागात इमारतीचे निखळलेले प्लायवूडचे छत अद्यापही त्याच अवस्थेत आहे. यंदा पावसाला सुरुवात झाली असून, येथील कर्मचारी जीव धोक्यात घालून काम करीत आहेत.
आरटीओच्या लर्निंग लायसन्स विभागात छताला सर्वत्र प्लायवूड लावण्यात आले आहे. पावसाचे पाणी गळून ते प्लायवूड पूर्णपणे कुजले आहे. गेल्या वर्षी पावसाळ्यात या विभागातील बायोमेट्रिक रूममध्ये काम सुरू असताना छताचे अर्धे प्लायवूड कोसळले. तसेच, भिंतीतून झिरपणाऱ्या पाण्यामुळे शॉकही बसत होता. त्यामुळे त्यावेळी हा विभाग दुसरीकडे हलविण्यात आला होता. तेव्हापासून आतापर्यंत या विभागातील प्लायवूड व इलेक्ट्रिक वायरिंग दुरुस्त करण्यात आलेली नाही.
लर्निंग लायसन्ससाठी या इमारतीत दररोज सुमारे चारशे उमेदवार येतात. येथे पैसे भरण्यासाठी आणि फोटो व बायोमेट्रिकसाठी त्यांच्या रांगा लागतात. उमेदवारांच्या बसण्याच्या ठिकाणी, परीक्षा देण्याच्या ठिकाणी, तसेच पैसे भरण्याच्या ठिकणीही छाताची दुरवस्था झाली आहे.
तातडीने उपाययोजनांची मागणी
बायोमेट्रिक विभागातील परिस्थिती अधिक चिंताजनक असल्याने यंदा अवकाळी पावसाला सुरुवात झाल्यावर हा विभाग दुसरीकडे हलविण्यात आला होता. मात्र, आता पुन्हा जुन्याच ठिकाणी कामकाज सुरू केले आहे. या विभागातील इलेक्ट्रिक वायरिंग खुलेच आहे. तसेच, येथे बॅटरी मोठ्या संख्येने उघड्या ठेवल्या आहेत. त्यामुळे भविष्यात शॉर्ट सर्किट किंवा भिंतीतून प्रवाहित होणाऱ्या वीज पुरवठ्यामुळे मोठ्या अपघाताची शक्यता नाकारता येत नाही. त्यामुळे येथे तातडीने उपाययोजना कराव्यात, अशी मागणी केली जात आहे.