सत्ताधाऱ्यांनी केला प्रशासनाचा निषेध

उड्डाणपूलासाठी दिरंगाई होत असल्याचे कारण

म. टा. प्रतिनिधी, पुणे

चांदणी चौकातील उड्डाणपुलाच्या अनुषंगाने आवश्यक भूसंपादन करण्यास दिरंगाई होत असल्याच्या पार्श्वभूमीवर सत्ताधारी भाजप नगरसेवकांनी विशेष सर्वसाधारण सभेत प्रशासनाचा निषेध करून आंदोलन केले. सत्ताधारी नगरसेवकांनीच आंदोलनाची भूमिका घेतल्याचे पाहून विरोधकांनाही त्यांच्या सुरात सूर मिसळण्याचा प्रयत्न केला.
कोथरूड-बावधन प्रभाग समितीचे अध्यक्ष दिलीप वेडे-पाटील, डॉ. श्रध्दा प्रभुणे, किरण दगडे पाटील, अल्पना वर्पे या भाजपच्या नगरसेवकांनी विशेष सर्वसाधारणसभा सुरू होताच निषेधाचे फलक घेऊन ‘वेल’मध्ये उभे राहिले. सत्ताधारी नगरसेवक आंदोलन करत असल्याचे पाहून विरोधकांनीही संधी सोडली नाही. त्यांनीही सत्ताधाऱ्यांना पाठिंबा दिला. सभेचे कामकाज पाहणारे सभापती, उपमहापौर डॉ. सिद्धार्थ धेंडे यांनी ही विशेष सभा असल्याने आंदोलन करू नका, अशी सूचना केली. त्याला काँग्रेसच्या गटनेत्यांनी हरकत घेतली.
चांदणी चौकातील भूसंपादन कधी होणार, अजून किती बळी गेल्यानंतर प्रशासनाला जाग येणार आदी प्रश्न नगरसेवकांकडून विचारण्यात आले. पुढील सर्वसाधारणसभेत या विषयी प्रशासनाकडून खुलासा करण्यात येईल, असे सभापतींनी सांगितल्यानंतर आंदोलन संपले. चांदणी चौकातील नियोजित उड्डाणपूलासाठी अद्याप भूसंपादनच झालेले नसताना भूमिपूजनाची घाई केली जात आहे, प्रशासन भूसंपादनाच्या कामाकडे अक्षम्य दुर्लक्ष करत आहे, असा आरोपही करण्यात आला.
शहराचे पश्चिम प्रवेशद्वार म्हणून ओळखल्या जाणाऱ्या चांदणी चौकातील वाहतूक कोंडी सोडवण्यासाठी उभारण्यात येणाऱ्या उड्डाणपुलाच्या भूमिपूजनाचा मुहूर्त निश्चित झाला आहे. केंद्रीय वाहतूक मंत्री नितीन गडकरी यांच्या हस्ते २७ ऑगस्टला भूमिपूजन होणार आहे. मात्र, या उड्डाणपूलाला लागणाऱ्या जागेचे भूसंपादन झालेले नाही. संपादन नसतानाही भूमिपूजन कसे, असा सवालही विरोधकांनी केला.

एक इंच जागाही ताब्यात नाही
नियोजित उड्डाणपुलासाठी साडेबारा हेक्टर जागा आवश्यक आहे. त्यापैकी एक हेक्टरही जागा अद्याप संपादित झालेली नाही. त्यामध्ये वनविभाग, खासगी जागा, पालिका आणि संरक्षण विभागाच्या जागांचा समावेश आहे. भूसंपादन न झाल्याने या कामासाठीच्या निविदेस मुदतवाढ देण्यात आली आहे. तरीही भूमिपूजनाचा घाट घालण्यात आल्याने प्रशासनाने खुलासा करण्याची मागणी भाजप सदस्यांनी केली.