म. टा. प्रतिनिधी, पुणे
पुण्यात प्रचारासाठी येणारे राजस्थानचे उपमुख्यमंत्री सचिन पायलट यांना शहर आणि प्रदेश काँग्रेसच्या नियोजनाचा फटका बसला. पायलट यांचे हेलिकॉप्टर पुण्यात उतरण्यापूर्वीच त्यांना सांगली येथून मुंबईला परतावे लागल्याची घटना बुधवारी दुपारी घडली. शहर काँग्रेसने पायलट यांची सभा तसेच रोड-शोचे आयोजन केले होते. मात्र, निवडणूक आयोगाच्या आदेशानुसार ४८ तासांपूर्वी या रोड-शो आणि सभेची परवानगी घेण्यास काँग्रेस असमर्थ ठरल्याने पायलट यांना पुण्यात उतरता आले नाही.
पायलट काँग्रेसचे स्टार प्रचारक असून, बुधवारी सांगली येथे त्यांच्या सभेचे आयोजन करण्यात आले होते. सांगली येथील सभेनंतर ते पुण्यातील उमेदवारांच्या प्रचारासाठी येणार होते. शहर काँग्रेसकडून तसे नियोजनही करण्यात आले. निवडणूक आयोगाच्या आदेशानुसार रोड-शो तथा सभा घेण्यासाठी ४८ तास आधी परवानगी घेणे बंधनकारक आहे. प्रदेश काँग्रेसने पालयट यांचा पुण्यातील दौरा ऐनवेळी ठरविल्याने पोलिसांकडून त्यांच्या सभेला आणि रोड-शोला परवानगी नाकारली. पायलट पुण्यात येणार अशी चर्चा बुधवारी दुपारपर्यंत होती. मात्र, परवानगी मिळत नसल्याचे स्पष्ट झाल्यानंतर त्यांना तसे कळविण्यात आल्याची माहिती एका ज्येष्ठ नेत्याने दिली. प्रदेश काँग्रेसला निवडणूक आयोगाच्या नियमांची माहिती असतानाही त्यांनी पायलट यांचा पुण्यातील दौऱ्याचे नियोजन कसे केले, असा प्रश्न शहर काँग्रेस नेत्यांकडून उपस्थित करण्यात येत आहे.
केवळ सांगलीत सभा
सांगली येथे पालयट यांची नियोजित सभा पार पडली. या सभेसाठी परवानगी घेण्यात आली होती. प्रदेश काँग्रेसने शहर काँग्रेसला वेळेत माहिती दिली असती तर, तयारी करता आली असती. मात्र, वेळेत नियोजन न केल्याने त्याचा फटका बसल्याची प्रतिक्रिया शहर काँग्रेसच्या नेत्यांनी व्यक्त केली. त्यामुळे पायलट यांनी बुधवारी सांगली येथील सभेनंतर पुण्यात न येता मुंबईला जाणे पसंत केले.
प्रदेश, शहर कॉँग्रेसमध्ये वादावादी
प्रदेश काँग्रेसने शहर काँग्रेसला ई-मेलद्वारे मंगळवारी रात्री पायलट पुण्यात येणार असल्याची माहिती दिली. प्रत्यक्षात शहर काँग्रेसच्या नेत्यांना ही माहिती बुधवारी सकाळी समजल्यानंतर त्यांचा एकच गोंधळ उडाला. दरम्यान, पायलट यांची सुरक्षाव्यवस्था मंगळवारी रात्रीच पुण्यात दाखल झाली. प्रदेश काँग्रेसने केलेल्या या नियोजनाची साधी कल्पनाही शहर काँग्रेसला देण्यात आली नाही. पायलट यांच्या सुरक्षाव्यवस्थेकडून शहर काँग्रेसला विचारणा करण्यात येत होती. मात्र, शहर काँग्रेसच्या नेत्यांना फारशी काही कल्पना नव्हती. अखेर या प्रकारावरून प्रदेश आणि शहर काँग्रेसमधील नेत्यांमध्ये वादावादीही झाली.
ज्योतिरादित्य आज पुण्यात
काँग्रेसचे मध्य प्रदेशातील नेते ज्योतिरादित्य शिंदे पुण्यात प्रचारासाठी येत असून, वानवडी येथील महात्मा फुले सांस्कृतिक भवनात आज, गुरुवारी सायंकाळी त्यांच्या सभेचे आयोजन करण्यात आले आहे. शिंदे यांची पुण्यात सभा सुरू असतानाच पंतप्रधान नरेंद्र मोदी यांची एसपी कॉलेजच्या मैदानावरील सभा होणार आहे.
पुण्यात प्रचारासाठी येणारे राजस्थानचे उपमुख्यमंत्री सचिन पायलट यांना शहर आणि प्रदेश काँग्रेसच्या नियोजनाचा फटका बसला. पायलट यांचे हेलिकॉप्टर पुण्यात उतरण्यापूर्वीच त्यांना सांगली येथून मुंबईला परतावे लागल्याची घटना बुधवारी दुपारी घडली. शहर काँग्रेसने पायलट यांची सभा तसेच रोड-शोचे आयोजन केले होते. मात्र, निवडणूक आयोगाच्या आदेशानुसार ४८ तासांपूर्वी या रोड-शो आणि सभेची परवानगी घेण्यास काँग्रेस असमर्थ ठरल्याने पायलट यांना पुण्यात उतरता आले नाही.
पायलट काँग्रेसचे स्टार प्रचारक असून, बुधवारी सांगली येथे त्यांच्या सभेचे आयोजन करण्यात आले होते. सांगली येथील सभेनंतर ते पुण्यातील उमेदवारांच्या प्रचारासाठी येणार होते. शहर काँग्रेसकडून तसे नियोजनही करण्यात आले. निवडणूक आयोगाच्या आदेशानुसार रोड-शो तथा सभा घेण्यासाठी ४८ तास आधी परवानगी घेणे बंधनकारक आहे. प्रदेश काँग्रेसने पालयट यांचा पुण्यातील दौरा ऐनवेळी ठरविल्याने पोलिसांकडून त्यांच्या सभेला आणि रोड-शोला परवानगी नाकारली. पायलट पुण्यात येणार अशी चर्चा बुधवारी दुपारपर्यंत होती. मात्र, परवानगी मिळत नसल्याचे स्पष्ट झाल्यानंतर त्यांना तसे कळविण्यात आल्याची माहिती एका ज्येष्ठ नेत्याने दिली. प्रदेश काँग्रेसला निवडणूक आयोगाच्या नियमांची माहिती असतानाही त्यांनी पायलट यांचा पुण्यातील दौऱ्याचे नियोजन कसे केले, असा प्रश्न शहर काँग्रेस नेत्यांकडून उपस्थित करण्यात येत आहे.
केवळ सांगलीत सभा
सांगली येथे पालयट यांची नियोजित सभा पार पडली. या सभेसाठी परवानगी घेण्यात आली होती. प्रदेश काँग्रेसने शहर काँग्रेसला वेळेत माहिती दिली असती तर, तयारी करता आली असती. मात्र, वेळेत नियोजन न केल्याने त्याचा फटका बसल्याची प्रतिक्रिया शहर काँग्रेसच्या नेत्यांनी व्यक्त केली. त्यामुळे पायलट यांनी बुधवारी सांगली येथील सभेनंतर पुण्यात न येता मुंबईला जाणे पसंत केले.
प्रदेश, शहर कॉँग्रेसमध्ये वादावादी
प्रदेश काँग्रेसने शहर काँग्रेसला ई-मेलद्वारे मंगळवारी रात्री पायलट पुण्यात येणार असल्याची माहिती दिली. प्रत्यक्षात शहर काँग्रेसच्या नेत्यांना ही माहिती बुधवारी सकाळी समजल्यानंतर त्यांचा एकच गोंधळ उडाला. दरम्यान, पायलट यांची सुरक्षाव्यवस्था मंगळवारी रात्रीच पुण्यात दाखल झाली. प्रदेश काँग्रेसने केलेल्या या नियोजनाची साधी कल्पनाही शहर काँग्रेसला देण्यात आली नाही. पायलट यांच्या सुरक्षाव्यवस्थेकडून शहर काँग्रेसला विचारणा करण्यात येत होती. मात्र, शहर काँग्रेसच्या नेत्यांना फारशी काही कल्पना नव्हती. अखेर या प्रकारावरून प्रदेश आणि शहर काँग्रेसमधील नेत्यांमध्ये वादावादीही झाली.
ज्योतिरादित्य आज पुण्यात
काँग्रेसचे मध्य प्रदेशातील नेते ज्योतिरादित्य शिंदे पुण्यात प्रचारासाठी येत असून, वानवडी येथील महात्मा फुले सांस्कृतिक भवनात आज, गुरुवारी सायंकाळी त्यांच्या सभेचे आयोजन करण्यात आले आहे. शिंदे यांची पुण्यात सभा सुरू असतानाच पंतप्रधान नरेंद्र मोदी यांची एसपी कॉलेजच्या मैदानावरील सभा होणार आहे.