टाळ-मृदंगाच्या गजरात दुमदुमले देहू; तुकोबारायांच्या पालखीचे प्रस्थान

मटा ऑनलाइन वृत्त। पुणे

आपल्या लाडक्या पांडुरंगाच्या दर्शनाची ओढ लागलेल्या हजारो वारकऱ्यांसह टाळ-मृदंगाच्या गजरात विठूनामाचा जप करत आज जगदगुरू संतश्रेष्ठ तुकाराम महाराजांच्या पालखीचे देहूतून पंढरपूरकडे प्रस्थान झाले. संत तुकाराम महाराजांच्या पालखीचे यंदाचे ३३२ वे वर्ष आहे. इंद्रायणी नदीच्या काठी सुरू झालेल्या या यंदाच्या पालखी सोहळ्यात रथाच्या पुढे आणि मागे असे मिळून ३३१ दिंड्या सहभागी झाल्या आहेत.

पंढरपूरकडे निघालेल्या पालखीचा आजचा मुक्काम इनामदार वाड्यात असणार आहे. उद्या सकाळी १० वाजता पालखी आकुर्डीकडे प्रस्थान ठेवणार आहे. दुपारनंतर पालखीचे पिंपरी-चिंचवडमध्ये आगमन होणार आहे.

आज पहाटे साडेचार वाजता संत तुकाराम महाराज शीळा मंदिरात महापूजा करण्यात आली. त्यानंतर पहाटे साडेपाच वाजता श्री विठ्ठल-रुक्मिणी मंदिरात महापूजा करण्यात आली. तसेच सकाळी ७ वाजता पालखी सोहळ्याचे जनक तपोनिधी नारायण महाराज समाधी येथे महापूजा करण्यात आली. तर, सकाळी ९ वाजता संभाजी महाराज देहूकर यांचे पालखी सोहळा सप्ताहाचे काल्याचे किर्तन झाले. यंदा पादुका पूजनाचा मान ज्येष्ठ वारकरी रामभाऊ हटकळे यांना देण्यात आला. हटकळे हे परभणी जिल्ह्यातील इटुलीचे रहिवाशी आहेत.

दुपारी अडीच वाजण्याच्या सुमाराला पालखी प्रस्थान सोहळ्याला प्रारंभ झाला. सिक्कीमचे राज्यपाल श्रीनिवास पाटील यांनी सपत्निक पालखीतील पादुकांचे पूजन केले.