पालिका शाळांतील मुलींना मोफत सॅनिटरी नॅपकिन

म. टा. प्रतिनिधी, पुणे

महापालिकेच्या शिक्षण विभागाच्या शाळेतील इयत्ता पाचवी ते बारावीच्या सर्व विद्यार्थिनींना मोफत सॅनिटरी नॅपकिन देण्याचा प्रस्ताव मंगळवारी स्थायी समितीच्या बैठकीत मान्य करण्यात आला. समितीचे अध्यक्ष योगेश मुळीक यांनी पत्रकार परिषदेत ही माहिती दिली.

पालिकेच्या शाळेतील विद्यार्थिनींना पालिकेच्या माध्यमातून पहिल्या टप्यात प्रत्येक महिन्याला हे नॅपकिन दिले जाणार आहेत; तर या योजनेच्या दुसऱ्या टप्प्यात सॅनिटरी नॅपकिनची शास्त्रोक्त पद्धतीने विल्हेवाट लावण्याची यंत्रणा उभारण्यात येणार आहे. यापूर्वी पालिकेच्या शाळेत शिकणाऱ्या आठवी ते दहावीच्या विद्यार्थिनींना महापालिकेने सॅनिटरी नॅपकिन पुरविण्याचा निर्णय घेतला होता. १२ शाळांमध्ये याचे वाटप केले जात होते. पालिका शाळांमधील किशोरवयीन मुलींमध्ये मासिक पाळीदरम्यान स्वच्छतेच्या पारंपरिक सवयी, समज-गैरसमज आणि अंधश्रद्धा यामुळे त्यांच्या आरोग्यावर व शिक्षणावर विपरीत परिणाम होत असतो. सॅनिटरी नॅपकिनचा वापर खूपच कमी असल्याचे विविध सर्वेक्षणांतून निदर्शनास आल्याने पालिकेच्या सर्वच शाळामध्ये नॅपकिन देण्याचा निर्णय काही महिन्यांपूर्वी महिला बाल कल्याण समितीने घेतला होता. त्याचा प्रस्ताव मांडून मान्यता देण्यात आली होती.

सॅनिटरी नॅपकिनची बाजारात उपलब्ध असलेली किंमत सर्वसामान्य आर्थिक परिस्थिती असलेल्या कुटुंबांना परवडत नाही, तर दुकानदाराकडे सॅनिटरी नॅपकिन मागण्यासाठी जाण्याचा अनेकांना संकोच वाटतो, या कारणांमुळे मुली सॅनिटरी नॅपकिनचा वापर करू शकत नाहीत. त्या पार्श्वभूमीवर हा निर्णय महत्त्वपूर्ण ठरणार आहे. यासाठी शाळांमध्ये जनजागृती व समुपदेशन करण्याचा निर्णय घेण्यात आल्याचेही मुळीक यांनी सांगितले.