शाळांच्या मैदानावर सायंकाळी पार्किंग

वाहतूक कोंडी सोडविण्यासाठी निर्णय

म. टा. प्रतिनिधी, पुणे

शहराच्या मध्यवर्ती भागातील वाहतूक कोंडी आणि पार्किंगची समस्या सोडविण्यासाठी वाहतूक पोलिसांकडून सायंकाळी सहानंतर शाळांच्या मैदानावर पार्किंगची पर्यायी व्यवस्था करण्यात आली आहे.
पहिल्या टप्प्यात टिळक रस्त्यावरील स. प. महाविद्यालय, नूमवि मुलींची प्रशाला, बाजीराव रस्त्यावरील सरस्वती मंदीर या शाळांची मैदाने पार्किंगसाठी उपलब्ध असणार आहेत. या ठिकाणी सशुल्क पार्किंगची व्यवस्था असणार आहे.
लक्ष्मी रस्ता, कुमठेकर रस्ता, टिळक रस्ता भागात खरेदीसाठी मोठ्या प्रमाणात ग्राहक येतात. रस्त्यावरील पार्किंग, पालिकेचे पार्किंग भरल्यानंतर वाहनचालकांना गाडी लावण्यासाठी जागाही मिळत नाही. त्यामुळे अनेकजण रस्त्यावरच ‘नो पार्किंग’मध्ये गाडी लावून वाहतुकीला अडथळे निर्माण करतात. ही कोंडी सोडविण्यासाठी सायंकाळी सहानंतर शाळांची मैदाने उपलब्ध व्हावीत, यासाठी वाहतूक पोलिसांनी प्रयत्न केले. त्यामध्ये तीन संस्थांनी सकारात्मक प्रतिसाद दिला आहे. दिवसभर शाळा असल्याने त्या ठिकाणी पार्किंग करता येणार नाही. परंतु, सायंकाळी शाळेची मैदाने उपलब्ध होऊ शकतात. या काळात वाहनचालकांनी रस्त्यावर गाड्या लावू नयेत यासाठी वाहतूक पोलिस त्यांना मार्गदर्शन करणार आहेत. नागरिकांमध्ये जनजागृती केली जाईल. तसेच, इतर शाळांशी देखील बोलणी सुरू आहे. सध्या प्रायोगिक तत्वावर ही योजना राबविण्यात येत असल्याचे वाहतूक शाखेचे उपायुक्त अशोक मोरोळे यांनी सांगितले.