म. टा. प्रतिनिधी, पुणे
आबेदा इनामदार कनिष्ठ महाविद्यालयात नुकतीच आंतरमहाविद्यालयीन विज्ञान प्रश्नमंजूषा पार पडली. आबेदा इनामदार कनिष्ठ महाविद्यालयाने ही स्पर्धा २१० गुणांसह जिंकून 'आबेदा इनामदार करंडक' पटकावला. स्पर्धेत पीसीएमबी (फिजिक्स, केमिस्ट्री, मॅथेमॅटिक, बायॉलॉजी) या विषयावर आधारित चार फेऱ्या घेण्यात आल्या. स्पर्धेत एस. एम. चोक्सी, सरदार दस्तुर, महावीर, सेंट व्हिसेंट, अँग्लो उर्दू बॉइज, आबेदा इनामदार कनिष्ठ महाविद्यालय व एस. व्ही. युनियन ही सात महाविद्यालये सहभागी झाली होती. एस. एम. चोक्सीने २०० गुणांसह द्वितीय स्थान प्राप्त केले. पारितोषिक वितरणासाठी एम. सी. ई. सोसायटी संस्थेचे अध्यक्ष डॉ. पी. ए. इनामदार, उपाध्यक्ष आबेदा इनामदार, प्राचार्य आयेशा शेख, उपप्राचार्य सय्यद गफ्फार, पर्यवेक्षिका तसनिम शेरकर उपस्थित होते. विनिता चड्डा (सेंट अॅन्स स्कूल) व रेश्मा हलदे (एस. व्ही. युनियन कनिष्ठ महाविद्यालय) यांनी परीक्षक म्हणून काम पाहिले.
कवयित्रींशी गप्पा
महाराष्ट्र साहित्य परिषदेच्या 'लेखक तुमच्या भेटीला' या कार्यक्रमात कवयित्री आश्लेषा महाजन आणि मीरा शिंदे सहभागी होणार आहेत. कर्वे रोडवरील सेंट क्रिस्पिन्स होम कन्या शाळेतील विद्यार्थिनींशी त्या संवाद साधणार आहेत. या वेळी मुख्याध्यापिका माधवी सॅम्युअल, मसापचे कार्याध्यक्ष प्रा. मिलिंद जोशी, प्रमुख कार्यवाह प्रकाश पायगुडे, कोषाध्यक्ष सुनीताराजे पवार उपस्थित राहणार आहेत. हा कार्यक्रम ३० जुलै रोजी सकाळी ११ वाजता होणार आहे, अशी माहिती या उपक्रमाचे समन्वयक माधव राजगुरू यांनी दिली.
सराफ यांचा सन्मान
सामाजिक कार्यकर्ते आणि सार्वजनिक गणेशोत्सवाला विधायक वळण देण्यासाठी प्रयत्नशील असणारे आनंद सराफ यांचा एकसष्ठीपूर्तीनिमित्त सन्मान करण्यात येणार आहे. २९ जुलै रोजी सायंकाळी ५.३० वाजता भवानी पेठेतील सावित्रीबाई फुले सभागृहात कार्यक्रम होणार आहे. पराग ठाकूर, शिरीष मोहिते, शाहीर हेमंत मावळे आणि मित्रपरिवाराने कार्यक्रमाचे आयोजन केले आहे. वीरमाता मनीषा सूर्यवंशी यांच्या हस्ते सराफ यांचा सत्कार करण्यात येणार आहे. सराफ यांनी लिहिलेल्या 'बावनकशी' या पुस्तकाचे प्रकाशन लोकमान्य मल्टिपर्पज सोसायटीचे संस्थापक अध्यक्ष किरण ठाकूर यांच्या हस्ते होणार आहे. या वेळी पालकमंत्री गिरीश बापट, लेफ्टनंट जनरल सतीश सातपुते, दीपक पायगुडे उपस्थित राहणार आहेत.