नोकराने ३३७ तोळे सोनं पळवलं

मटा ऑनलाइन वृत्त । पुणे

सराफा दुकानातील एका विश्वासू नोकराने दुकानच साफ केल्याची धक्कादायक घटना घडली आहे. या नोकराने दुकानातील दोन-तीन नव्हे तर एकुण ३३७ तोळे सोने लंपास केले आहे. ८८ लाख रूपये किंमतीचे हे सोने असून या धक्कादायक घटनेमुळे पुणे हादरून गेले आहे. दरम्यान हा नोकर फरार असून पोलीस त्याचा शोध घेत आहेत.

रविवार पेठ परिसरात ही घटना घडली. मुंबईतील मीरा-भाईंदर येथे राहणारा जितेंद्र रतनचंद संघवी हा मनोज युवराज राठोड या सराफाकडे कामाला होता. राठोड यांच्या दुकानाची जबाबदारी संघवीकडे होती. राठोड हे संघवीवर विश्वास टाकून दुकान सोडून जात. संघवीने मात्र त्यांच्या या विश्वासाचा गैरफायदा घेतला. संघवीने जून २०१६ ते जून २०१७ या काळात दुकानातील तब्बल ८८ लाख रूपये किंमतीचे ३३७ तोळे दागिने लंपास केले. हा प्रकार उजेडात आल्यानंतर राठोड अक्षरश: हादरून गेले. त्यांनी क्षणाचाही विचार न करता या प्रकरणी खडक पोलीस ठाण्यात गुन्हा दाखल केला असून पोलीस अधिक तपास करत आहेत.