‘सेतू’च्या तपासणीचे आदेश

तहसीलदार घेणार महिनाभरात झाडाझडती

म. टा. प्रतिनिधी, पुणे

महा-ई-सेवा केंद्र आणि सेतू सुविधा केंद्रांमधील गैरप्रकार रोखण्यासाठी सर्व केंद्रांची तहसीलदारांच्या पथकाद्वारे महिन्यात तपासणी करण्यात येणार आहे. या केंद्रांनी ‘ऑफलाइन’ अर्ज स्वीकारू नयेत, दराचे फलक कार्यालयात लावावेत, असे आदेश जिल्हा प्रशासनाने दिले आहेत. नागरिकांकडून जास्त शुल्क आकारणी​ केल्याचे आढळल्यास परवाने रद्द करण्याचा निर्णय घेण्यात आला आहे.
महा-ई-सेवा आणि सेतू सुविधा केंद्रांमध्ये नागरिकांना योग्य सेवा देण्यात येत नाही; तसेच जास्त शुल्क आकारणी केली जाते अशा प्रकारच्या तक्रारी जिल्हा प्रशासनाकडे आल्या होत्या. या पार्श्वभूमीवर ​अतिरिक्त जिल्हाधिकारी रमेश काळे आणि निवासी उपजिल्हाधिकारी राजेंद्र मुठे यांनी शहरातील महा-ई- सेवा केंद्रचालकांची बैठक घेतली. या बैठकीत संबंधित केंद्रचालकांना समज देण्यात आली. नागरिकांशी योग्य पद्धतीने वर्तन करण्यात येत नसल्याचे बैठकीत निदर्शनास आणून देण्यात आले. या केंद्रांमध्ये अनेक त्रुटी आहेत. त्यामध्ये नागरिकांची पिळवणूक केली जाते, नागरिकांकडून जास्त पैसे घेण्यात येतात. अनेक केंद्रांमध्ये ऑफलाइन अर्ज स्वीकारून ते पुढील कार्यवाहीसाठी पाठविले जातात. या त्रुटी सुधारून सेवा हमी कायद्याची अंमलबजावणी करण्याच्या सूचना बैठकीत देण्यात आल्या.
मुठे म्हणाले की, ‘महा-ई-सेवा केंद्रांमधील गैरप्रकार रोखण्यासाठी तहसीलदारांची पथके नेमण्याचा निर्णय बैठकीत घेण्यात आला. या पथकांकडून एका महिन्यात सर्व केंद्रांची तपासणी केली जाणार आहे. त्याचे अहवाल आल्यानंतर त्रुटी आढळलेल्या केंद्रांचे परवाने रद्द करण्यात येणार आहेत.’ ‘अनेक केंद्रांमध्ये ऑनलाइन अर्ज घेण्याऐवजी ऑफलाइन अर्ज घेऊन ते पुढील कार्यवाहीसाठी पाठविण्यात येतात. यापुढे ऑनलाइनच अर्ज घेण्याच्या सूचना देण्यात आल्या आहेत. प्रत्येक कागदपत्रासाठी किती शुल्क आकारले जाते, याचे दर निश्चित करण्यात आले आहेत. त्याचा फलक केंद्राच्या बाहेर लावण्याचे आदेश देण्यात आले आहेत. त्यापेक्षा जास्त पैसे आकारल्याचे आढळल्यास कारवाई केली जाणार आहे.’

फलकाचे फोटो पाठविण्याचे आदेश
‘बैठकीत घेण्यात आलेल्या निर्णयांची अंमलबजावणी झाली आहे की नाही आणि सूचनांचे पालन करण्यात येते का, हे तपासण्यासाठी सर्व महा-ई-सेवा केंद्रचालकांचा व्हॉटस्अॅप ग्रुप तयार करण्यात आला आहे. त्यावर दराच्या फलकांचे फोटो पाठवण्याचे आदेश केंद्रचालकांना देण्यात आले आहेत.’ असे अतिरिक्त जिल्हाधिकारी काळे यांनी सांगितले.

महा-ई-सेवा केंद्रांवर गैरप्रकार होत असल्याची तक्रार आल्यास त्याची ताबडतोब तपासणी केली जाणार आहे. तक्रारीत तथ्य आढळल्यास संबधित केंद्रचालकाचा परवाना रद्द करण्यात येणार आहे.
- राजेंद्र मुठे
निवासी उपजिल्हाधिकारी