अवघे पाऊणशे वयमान...

सत्त्याहत्तर वर्षीय आजींनी गाजवला रंगमंच; ‘वहिनी’च्या भूमिकेला दाद

म. टा. प्रतिनिधी, पुणे

एकांकिका स्पर्धा म्हणजे महाविद्यालयीन तरुणांच्या विविध कलागुणांनी भारलेलं वातावरण... तरुणांच्या सहभागाचा उत्साहही वाखाणण्याजोगाच... मात्र, सध्या सुरू असलेल्या विनोदोत्तम करंडक स्पर्धेमध्ये वेगळेच चित्र पाहायला मिळाले. चक्क ७७ ‍वर्षांच्या आजींनी रंगमंचावर एंट्री घेतली आणि ‘पाहुणचार’ या एकांकिकेत ‘वहिनी’ची भूमिका साकारून प्रेक्षकांच्या टाळ्या मिळवल्या.
डॉ. सुलभा फडणीस असे या ज्येष्ठ कलाकाराचे नाव असून, विशेष म्हणजे वयाच्या पंच्याहत्तरीनंतर त्यांनी अभिनयाचा श्रीगणेशा केला. ‘दामोदर नाट्यसंघां’तर्गत चंद्रशेखर देशपांडे यांनी या एकांकिकेचे लेखन आणि दिग्दर्शन केले आहे. यामधील ‘अवधूत भावजी’ हे पात्र शेती, प्राणी उपचार या संबंधित व्याख्याने घेत गावोगावी फिरत असते. या दौऱ्याच्या निमित्ताने ते आठवडाभर नातेवाइकांकडे ठाण मांडतात. त्यांच्या अशा चिकटून राहण्याचा नातेवाइकांना खूपच त्रास होतो. अशा स्वभावाच्या भावजींना जोशी काकू चांगलाच धडा शिकवतात. हात फ्रॅक्चर झाल्याचं कारण देत आपल्याच घरात त्यांना कामासाठी राबवतात आणि भावजी या फजितीत अडकत जातात, असा एकांकिकेचा विषय आहे.
‘सुरुवातीला देशपांडेंसोबत हौस म्हणून नाटक करत होते. त्यानंतर खूप आवड निर्माण झाली. अनेक स्पर्धांमध्ये मी अभिनयाचे बक्षीस मिळवले आहे. यातून मला फक्त आनंद मिळतो. आता नाटक नसेल, तर करमत नाही. जवळजवळ एक महिना आम्ही रोज संध्याकाळी तीन तास नाटकाचा सराव करायचो,’ असं फडणीस यांनी सांगितले.

नव्याने लेखन
यंदा स्पर्धेमध्ये २०हून अधिक एकांकिकांचे नव्याने लेखन झाले आहे. सहभागी स्पर्धकांनी जुन्या गाजलेल्या विनोदी लेखन किंवा पुस्तकातील कथांचे नाट्यरुपांतर न करता नवीन लिखान केल्याचे आयोजक हेमंत नगरकर यांनी सांगितले. विनोदी कथा लिहिणे अवघड असताना स्पर्धेमध्ये दिसणारा हा बदल नक्कीच दखल घेण्याजोगा आहे, असंही त्यांनी नमूद केले.

आजच्या एकांकिका
२० सप्टेंबर : दुपारी. १ ते रा. १२पर्यंत : स्थळ : भरत नाट्य मंदिर
‘मी शुभांगी देवधर’, ‘झेडपी’, ‘बायकोच्या नवऱ्याच्या बायकोचा खून’, ‘शेलिब्रेटी’, ‘चि. श्री. व सौ. साखरे’, ‘लगीनघाई’, ‘घरमालक’, ‘बंदी’ आणि ‘भूक-भीती-भीक-मागेगिरी’