म. टा. प्रतिनिधी, पुणे
महापालिका निवडणुकीच्या निमित्ताने पुणेकरांशी संवाद साधण्यासाठी राष्ट्रवादी काँग्रेसचे अध्यक्ष आणि माजी केंद्रीय कृषिमंत्री शरद पवार प्रचारात उतरणार आहेत. यापूर्वीच्या निवडणुकीतील एकाच दिवशी सहा ते सात सभा घेण्याचा पायंडा बाजूला ठेवत यंदा एका दिवसात एक किंवा दोन मतदारसंघांतच सभा घेण्याचे नियोजन पवार यांनी केले आहे. गेल्या दहा वर्षांपासून पालिकेत सत्ताधारी म्हणून जबाबदारी संभाळणाऱ्या राष्ट्रवादी काँग्रेसची पाठराखण करताना पालिका निवडणुकीला समोरे जाताना शरद पवार पुणेकरांसमोर कोणते मुद्दे मांडणार याकडे सर्वांचे लक्ष लागले आहे.
यापूर्वीच्या निवडणुकांवेळी निवडणुकीच्या प्रचाराची सांगता होण्यास एक ते दोन दिवस शिल्लक असताना शरद पवार यांच्या जाहीर सभा झालेल्या आहेत. पालिका निवडणुकांसाठी एकाच दिवसात वेगवेगळ्या मतदारसंघांत सभा घेऊन दिवसभरात सहा ते सात सभा घेणे ही पवारांची खासियत आहे. २००७च्या निवडणुकीत प्रचाराच्या अखेरच्या दिवशी पवार यांनी शहरातील विविध विधानसभा मतदारसंघांत सभा घेऊन ‘कारभारी बदला, भाकरी फिरवा’ असे आवाहन करून खासदार सुरेश कलमाडी यांना शह दिला होता. २०१२मध्येही पवार यांनी शेवटच्या टप्प्यात सभा घेतल्या होत्या.
लोकसभा, विधानसभा निवडणुकीत आलेल्या मोदी लाटेचा जोरदार फटका बसून काँग्रेस, राष्ट्रवादी काँग्रेससह सर्वच राजकीय पक्षांचा धुव्वा उडाला होता. महापालिकेच्या निवडणुकीत पक्षाला याचा फटका बसू नये, यासाठी पक्षाचे सर्वेसर्वा शरद पवार यांनी प्रचारात उतरावे, अशी विनंती इच्छुक उमेदवारांबरोबरच पक्षाच्या ज्येष्ठ पदाधिकाऱ्यांकडून पवार यांना केली जात होती. निवडणुकीच्या प्रचारासाठी भाजपकडून मुख्यमंत्री देवेंद्र फडणवीस मैदानात उतरले आहेत. शिवसेनेचे पक्षप्रमुख उद्धव ठाकरे यांच्याबरोबरच मनसेचे अध्यक्ष राज ठाकरे हेदेखील प्रचारात उतरणार असून त्यांच्या सभा होणार आहेत.
राष्ट्रवादी काँग्रेसच्या प्रचाराचा नारळ माजी उपमुख्यमंत्री अजित पवार यांच्या हस्ते फोडण्यात आला. राज्यातील इतर महापालिकांमध्येही निवडणुका असल्याने त्यांचे दौरे सुरू आहेत. शहरातील कार्यकर्त्यांकडून केली जाणारी मागणी लक्षात घेऊन पवार यांनी जाहीर सभेला वेळ दिली आहे. गेल्या काही निवडणुकांप्रमाणे यंदा आठ दिवस अगोदरच प्रचार सभांना सुरुवात केली जाणार आहे. पालिका निवडणुकीला सामोरे जाताना पवार नक्की काय बोलणार याकडे सर्वांचेच लक्ष लागले आहे.
तारखा नक्की, ठिकाणे ठरणार
शरद पवार यांची पहिली सभा वडगाव शेरी मतदारसंघात १४ फेब्रुवारीला होणार आहे. १५ फेब्रुवारीला हडपसर मतदारसंघात, तसेच त्यानंतर १८ फेब्रुवारीला खडकवासला, पर्वती, कसबा विधानसभा मतदारसंघात पवार यांच्या जाहीर सभा होणार आहेत. या सभा नक्की कोठे घ्यायच्या याची ठिकाणे अद्याप निश्चित झालेली नाहीत. सोमवारपर्यंत हे निश्चित होईल, असे पक्षाचे प्रवक्ते अंकुश काकडे यांनी सांगितले.
महापालिका निवडणुकीच्या निमित्ताने पुणेकरांशी संवाद साधण्यासाठी राष्ट्रवादी काँग्रेसचे अध्यक्ष आणि माजी केंद्रीय कृषिमंत्री शरद पवार प्रचारात उतरणार आहेत. यापूर्वीच्या निवडणुकीतील एकाच दिवशी सहा ते सात सभा घेण्याचा पायंडा बाजूला ठेवत यंदा एका दिवसात एक किंवा दोन मतदारसंघांतच सभा घेण्याचे नियोजन पवार यांनी केले आहे. गेल्या दहा वर्षांपासून पालिकेत सत्ताधारी म्हणून जबाबदारी संभाळणाऱ्या राष्ट्रवादी काँग्रेसची पाठराखण करताना पालिका निवडणुकीला समोरे जाताना शरद पवार पुणेकरांसमोर कोणते मुद्दे मांडणार याकडे सर्वांचे लक्ष लागले आहे.
यापूर्वीच्या निवडणुकांवेळी निवडणुकीच्या प्रचाराची सांगता होण्यास एक ते दोन दिवस शिल्लक असताना शरद पवार यांच्या जाहीर सभा झालेल्या आहेत. पालिका निवडणुकांसाठी एकाच दिवसात वेगवेगळ्या मतदारसंघांत सभा घेऊन दिवसभरात सहा ते सात सभा घेणे ही पवारांची खासियत आहे. २००७च्या निवडणुकीत प्रचाराच्या अखेरच्या दिवशी पवार यांनी शहरातील विविध विधानसभा मतदारसंघांत सभा घेऊन ‘कारभारी बदला, भाकरी फिरवा’ असे आवाहन करून खासदार सुरेश कलमाडी यांना शह दिला होता. २०१२मध्येही पवार यांनी शेवटच्या टप्प्यात सभा घेतल्या होत्या.
लोकसभा, विधानसभा निवडणुकीत आलेल्या मोदी लाटेचा जोरदार फटका बसून काँग्रेस, राष्ट्रवादी काँग्रेससह सर्वच राजकीय पक्षांचा धुव्वा उडाला होता. महापालिकेच्या निवडणुकीत पक्षाला याचा फटका बसू नये, यासाठी पक्षाचे सर्वेसर्वा शरद पवार यांनी प्रचारात उतरावे, अशी विनंती इच्छुक उमेदवारांबरोबरच पक्षाच्या ज्येष्ठ पदाधिकाऱ्यांकडून पवार यांना केली जात होती. निवडणुकीच्या प्रचारासाठी भाजपकडून मुख्यमंत्री देवेंद्र फडणवीस मैदानात उतरले आहेत. शिवसेनेचे पक्षप्रमुख उद्धव ठाकरे यांच्याबरोबरच मनसेचे अध्यक्ष राज ठाकरे हेदेखील प्रचारात उतरणार असून त्यांच्या सभा होणार आहेत.
राष्ट्रवादी काँग्रेसच्या प्रचाराचा नारळ माजी उपमुख्यमंत्री अजित पवार यांच्या हस्ते फोडण्यात आला. राज्यातील इतर महापालिकांमध्येही निवडणुका असल्याने त्यांचे दौरे सुरू आहेत. शहरातील कार्यकर्त्यांकडून केली जाणारी मागणी लक्षात घेऊन पवार यांनी जाहीर सभेला वेळ दिली आहे. गेल्या काही निवडणुकांप्रमाणे यंदा आठ दिवस अगोदरच प्रचार सभांना सुरुवात केली जाणार आहे. पालिका निवडणुकीला सामोरे जाताना पवार नक्की काय बोलणार याकडे सर्वांचेच लक्ष लागले आहे.
तारखा नक्की, ठिकाणे ठरणार
शरद पवार यांची पहिली सभा वडगाव शेरी मतदारसंघात १४ फेब्रुवारीला होणार आहे. १५ फेब्रुवारीला हडपसर मतदारसंघात, तसेच त्यानंतर १८ फेब्रुवारीला खडकवासला, पर्वती, कसबा विधानसभा मतदारसंघात पवार यांच्या जाहीर सभा होणार आहेत. या सभा नक्की कोठे घ्यायच्या याची ठिकाणे अद्याप निश्चित झालेली नाहीत. सोमवारपर्यंत हे निश्चित होईल, असे पक्षाचे प्रवक्ते अंकुश काकडे यांनी सांगितले.