संजय राऊत घेणार शरद पवारांची मुलाखत

म. टा. प्रतिनिधी, पुणेः राज्यात उद्भवलेल्या सत्तापेचावर भाष्य करणारे शिवसेना नेते संजय राऊत हे महाविकास आघाडी सरकारच्या स्थापनेत निर्णायक भूमिका वठविणारे राष्ट्रवादी काँग्रेसचे अध्यक्ष शरद पवार यांची मुलाखत घेणार आहेत. येत्या रविवारी, २९ डिसेंबर रोजी पुण्यात यशवंतराव चव्हाण नाट्यगृहात हा 'रोखठोक' मुलाखतीचा सामना रंगणार आहे, अशी माहिती खुद्द संजय राऊत यांनी ट्विटरद्वारे दिली आहे.

शरद पवार आणि संजय राऊत यांचे निकटचे संबंध आहेत. राज्यात शिवसेना, राष्ट्रवादी काँग्रेस आणि काँग्रेसला एकत्र आणून महाविकास आघाडी सरकारचा प्रयोग करण्यात या दोन्ही नेत्यांनी महत्त्वाची भूमिका पार पाडली आहे. त्यानंतर आता पुन्हा हे नेते मुलाखतीच्या निमित्ताने एकाच व्यासपीठावर येत आहेत. त्यामुळे राज्यात रंगलेला सत्तानाट्याचा प्रयोग, बहुचर्चित 'किमान समान कार्यक्रमा'चे भवितव्य आणि सरकारची आगामी वाटचाल, यावर या मुलाखतीत काय भाष्य करणार, याकडे सर्वांचे लक्ष लागले आहे.

पुणे महापालिकेतील विरोधी पक्षनेते व 'राष्ट्रवादी'चे नेते दिलीप बराटे गेल्या काही वर्षांपासून कोथरूड साहित्य संमेलनाचे आयोजन करतात. या संमेलनात ही विशेष मुलाखत होणार आहे. दरम्यान, गतवर्षी मनसे अध्यक्ष राज ठाकरे यांनी 'बीएमसीसी' मैदानावर शरद पवार यांची घेतलेली मुलाखत चांगलीच गाजली होती. त्याचप्रमाणे राऊत-पवार सामनाही रंगेल, अशा चर्चा राजकीय वर्तुळात सुरू झाल्या आहेत.