पवार, ठाकरे आज पुणे दौऱ्यावर

म. टा. प्रतिनिधी, पुणे : माजी केंद्रीय मंत्री शरद पवार आणि मुख्यमंत्री उद्धव ठाकरे आज, बुधवारी पुण्यात होणाऱ्या वसंतदादा शुगर इन्स्टिट्यूटच्या (व्हीएसआय) सर्वसाधारण सभेला उपस्थित राहणार आहेत. राज्यातील सत्तास्थापनेनंतर दोन्ही नेते पुण्यातील व्यासपीठावर पहिल्यांदाच एकत्र येणार आहेत. मुख्यमंत्री ठाकरे पहिल्यांदाच मांजरी येथील 'व्हीएसआय'ला येत असून, ऊस उत्पादक शेतकऱ्यांबाबत ते कोणती भूमिका घेणार, हे स्पष्ट होणार आहे.

पवार 'व्हीएसआय'चे अध्यक्ष आहेत. या वेळी ऊस उत्पादक शेतकरी आणि कारखान्यांना पुरस्कार दिले जाणार आहेत. ऊस उत्पादक शेतकऱ्यांचे अनेक प्रश्न प्रलंबित आहेत. ते मार्गी लावण्यासाठी मुख्यमंत्री ठाकरे या कार्यक्रमात भूमिका जाहीर करण्याची शक्यता आहे.

साखरेचा प्रति क्विंटलचा निर्धारित दर तीन हजार १०० रुपये आहे. तो किमान तीन हजार ३०० रुपये करण्याची ऊस उत्पादक शेतकऱ्यांची मागणी आहे. साखरेसाठी द्विस्तरीय किंमत धोरण राबवण्याची या शेतकऱ्यांची मागणी असून, ग्राहक आणि व्यापारी वापरासाठी साखरेचे दोन दर असावेत, असा या शेतकऱ्यांचा आग्रह आहे. या मागण्या केंद्र सरकारशी संबंधित असल्या, तरी राज्य सरकार याबाबत काय करणार, यावर मुख्यमंत्री ठाकरे भाष्य करण्याची शक्यता वर्तविण्यात येत आहे.

या कार्यक्रमाला 'व्हीएसआय'चे उपाध्यक्ष दिलीप वळसे-पाटील, राज्याचे सहकार व पणन मंत्री जयंत पाटील, महसूल मंत्री बाळासाहेब थोरात उपस्थित राहणार आहेत.

पवारांची मुलाखत पुढे ढकलली

'साहित्यिक कलावंत प्रतिष्ठानतर्फे २८ आणि २९ डिसेंबर रोजी आयोजित १९ व्या साहित्यिक कलावंत संमेलनातील ज्येष्ठ नेते शरद पवार यांची नियोजित मुलाखत पुढे ढकलण्यात आली आहे. शिवसेनेचे नेते खासदार संजय राऊत ही मुलाखत घेणार होते. मात्र, राज्यातील मंत्रिमंडळाच्या विस्तारामुळे ही मुलाखत पुढे ढकलण्याचा निर्णय घेण्यात आला आहे. येत्या काही दिवसांत ही मुलाखत आयोजित करण्यात येईल. संमेलनातील उर्वरित सर्व कार्यक्रम नियोजनाप्रमाणेच होणार आहेत,' असे प्रतिष्ठानचे अध्यक्ष दिलीप बराटे यांनी कळविले आहे.